హైదరాబాద్ మహానగరంలోని పేద, దిగువ మధ్యతరగతి వర్గాలకు సొంతింటి కల నెరవేర్చేందుకు ప్రభుత్వం ప్రతిష్టాత్మకంగా చేపట్టిన ‘ఇందిరమ్మ టవర్స్’ పథకంపై కీలక పరిణామం చోటుచేసుకుంది.
ఈ పథకానికి సంబంధించి ప్రజల్లో ఉన్న సందేహాలను నివృత్తి చేసేందుకు మరియు దళారుల ప్రమేయాన్ని అరికట్టేందుకు వీలుగా ప్రభుత్వం ప్రత్యేక కాల్ సెంటర్ హెల్ప్లైన్ను అందుబాటులోకి తెచ్చింది.
హౌసింగ్ బోర్డు కార్యాలయంలో శనివారం ఈ హెల్ప్లైన్ కేంద్రం 040-24603572 ను రాష్ట్ర రెవెన్యూ, హౌసింగ్ శాఖ మంత్రి పొంగులేటి శ్రీనివాసరెడ్డి లాంఛనంగా ప్రారంభించారు.
ఉదయం 9 గంటల నుంచి సాయంత్రం 6 గంటల వరకు ఈ నంబర్ అందుబాటులో ఉంటుంది. తెలుగు, హిందీ, ఇంగ్లీష్, ఉర్దూ భాషలలో అధికారులు సమాచారం అందిస్తారు.
రూ. 60 లక్షల విలువైన ఇల్లు.. కేవలం రూ. 6 లక్షలకే!
నగర నడిబొడ్డున స్వంత ఇల్లు అనేది సగటు సామాన్యుడికి కలగానే మిగిలిపోతున్న తరుణంలో ఈ పథకం నిరుపేదలకు ఊరట నివ్వనుంది. ప్రతిపాదిత ఫ్లాట్లు సుమారు 525 చదరపు అడుగుల విస్తీర్ణంలో వన్ బెడ్రూమ్, హాల్, కిచెన్ (1BHK) సౌకర్యంతో నిర్మాణం జరుపుకోనున్నాయి.
మార్కెట్లో ఒక్కో ఫ్లాట్ విలువ రూ. 40 లక్షల నుంచి రూ. 60 లక్షల వరకు ఉంటుంది. అయితే ప్రభుత్వ రాయితీ రూ. 5 లక్షలు పోగా, లబ్ధిదారుడు కేవలం రూ. 6 లక్షలు చెల్లిస్తే సరిపోతుంది. అంతేకాకుండా, 20 నుంచి 25 గజాల అన్డివైడెడ్ షేర్ (UDS) స్థలాన్ని కూడా లబ్ధిదారుని పేరిట రిజిస్ట్రేషన్ చేస్తారు.
తొలి విడతలో 7,680 ఇళ్లు: అర్హత నియమాలు ఇవే
హైదరాబాద్ క్యూర్ (CURE) పరిధిలో మొత్తం లక్ష ఇళ్ల నిర్మాణాన్ని లక్ష్యంగా పెట్టుకోగా, మొదటి విడతలో 16 నియోజకవర్గాల వ్యాప్తంగా 7,680 ఇళ్ల నిర్మాణానికి శ్రీకారం చుట్టారు.
ప్రధాన అర్హతలు:
- కుటుంబ వార్షిక ఆదాయం రూ. 6.00 లక్షల మించకూడదు.
- దరఖాస్తుదారు క్యూర్ పరిధిలో కనీసం 10 ఏళ్లుగా నివాసం ఉండి ఉండాలి.
- ఔటర్ రింగ్ రోడ్ (ORR) లేదా క్యూర్ పరిధిలో సొంత ఇల్లు, ఫ్లాట్ లేదా స్థలం ఉండకూడదు.
- ఒక కుటుంబానికి ఒకే దరఖాస్తు, ఒకే ఫ్లాట్ కేటాయించబడుతుంది.
దరఖాస్తు ప్రక్రియ, ఈఎండి రీఫండ్ విధానం
దరఖాస్తు విధానాన్ని ప్రభుత్వం అత్యంత సులభతరం చేసింది. దరఖాస్తు సమయంలో ఎలాంటి కుల, ఆదాయ ధృవీకరణ పత్రాలు అప్లోడ్ చేయాల్సిన అవసరం లేదని, కేవలం ఆధార్ సంఖ్య తెలియజేస్తే సరిపోతుందని మంత్రి స్పష్టం చేశారు. లాటరీలో పేరు వచ్చినప్పుడు మాత్రమే అసలు పత్రాలు సమర్పించాల్సి ఉంటుంది.
ఇఎండి చెల్లింపు: దరఖాస్తు రుసుము రూ. 10,000 కేవలం UPI లేదా నెట్ బ్యాంకింగ్ ద్వారానే చెల్లించాలి.
డిపాజిట్ వాపస్: లాటరీలో ఇల్లు రాని పక్షంలో, ఈ రూ. 10 వేల మొత్తాన్ని నేరుగా దరఖాస్తుదారుడి బ్యాంక్ ఖాతాకే రీఫండ్ చేస్తారు.
దరఖాస్తు మార్గాలు: మీసేవ కేంద్రాలు, ఆన్లైన్ పోర్టల్ లేదా వాట్సాప్ ద్వారా అప్లై చేసుకోవచ్చు.
పారదర్శక కేటాయింపులు & భవిష్యత్తు ప్రణాళిక
దరఖాస్తుల పరిశీలనను పూర్తిగా డిజిటల్ విధానంలో చేపట్టి, అనంతరం క్షేత్రస్థాయి పరిశీలన జరుపుతారు. దరఖాస్తుదారుల సంఖ్య ఎక్కువగా ఉంటే పారదర్శకంగా డిజిటల్ లాటరీ విధానం ద్వారా ఇళ్లను కేటాయిస్తారు.
దళారులు, మధ్యవర్తులను నమ్మి డబ్బులు పోగొట్టుకోవద్దని మంత్రి హెచ్చరించారు. ఏవైనా సమస్యలు లేదా సందేహాలు ఉంటే నేరుగా అధికారిక హెల్ప్లైన్ను మాత్రమే సంప్రదించాలని కోరారు.
తరచుగా అడిగే ప్రశ్నలు
ఇందిరమ్మ టవర్స్ హెల్ప్లైన్ నంబర్ ఎంత? ఏ సమయంలో ఫోన్ చేయాలి?
హెల్ప్లైన్ నంబర్ 040-24603572. ఉదయం 9:00 గంటల నుంచి సాయంత్రం 6:00 గంటల మధ్య సంప్రదించవచ్చు.
దరఖాస్తు సమయంలో ఏ పత్రాలు అప్లోడ్ చేయాలి?
ప్రారంభంలో ఎలాంటి పత్రాలు అప్లోడ్ చేయక్కర్లేదు. కేవలం ఆధార్ నంబర్ ఇస్తే సరిపోతుంది. సర్టిఫికేట్లను లాటరీ సమయం లో సమర్పిస్తే సరిపోతుంది.
ఒకవేళ లాటరీలో ఇల్లు రాకపోతే చెల్లించిన రూ. 10,000 ఏమవుతాయి?
ఇల్లు మంజూరు కాని పక్షంలో మీరు ఇఎండి (EMD) రూపంలో చెల్లించిన రూ. 10,000 తిరిగి మీ బ్యాంక్ ఖాతాకే డిపాజిట్ అవుతాయి.
