ఇల్లు కొంటున్నారా? ఈ సర్టిఫికేట్ లేకపోతే చిక్కుల్లో పడ్డట్టే!

Property Documents

హైదరాబాద్: సొంత ఇల్లు అనేది ప్రతి ఒక్కరి జీవితకాల కల. అయితే ఆస్తి కొనుగోలు చేసే సమయంలో రిజిస్ట్రేషన్ పత్రాలు ఎంత ముఖ్యమో, ‘నాన్-ఎన్‌కంబరెన్స్ సర్టిఫికేట్’ (Non-Encumbrance Certificate) కూడా అంతే ముఖ్యం. దీనినే సాధారణ భాషలో ‘విల్లను సర్టిఫికేట్’ అని కూడా అంటారు.

అసలు ఈ సర్టిఫికేట్ అంటే ఏమిటి?

మీ ఆస్తిపై జరిగిన డబ్బు లావాదేవీల రిపోర్ట్ కార్డ్ ఇది. ఆ ఆస్తిపై ఎలాంటి చట్టపరమైన చిక్కులు లేవని, ఎవరికీ తాకట్టులో లేదని ఈ పత్రం నిరూపిస్తుంది. సాధారణంగా గత 12 ఏళ్లలో ఆ ఆస్తికి సంబంధించి జరిగిన కొనడం, అమ్మడం, లోన్లు, ఇతర లావాదేవీల వివరాలన్నీ ఇందులో ఉంటాయి.

దీనివల్ల లాభం ఏంటి?

ఆస్తిని గతంలో ఎవరికైనా అమ్మారా లేదా ఎక్కడైనా బ్యాంకులో తాకట్టు పెట్టారా అనేది తెలుస్తుంది. మీరు బ్యాంక్ లోన్ తీసుకోవాలనుకుంటే, ఈ సర్టిఫికేట్ ఖచ్చితంగా ఉండాలి. భవిష్యత్తులో ఆస్తికి సంబంధించి ఎటువంటి వివాదాలు తలెత్తకుండా ఇది ఒక రక్షణ కవచంలా పనిచేస్తుంది.

ఈ సర్టిఫికేట్ పొందడం ఎలా?

నాన్-ఎన్‌కంబరెన్స్ సర్టిఫికేట్ పొందడానికి ఈ క్రింది పద్ధతిని అనుసరించాలి.

ముందుగా స్థానిక తహసీల్ కార్యాలయాన్ని సందర్శించి దరఖాస్తు ఫారమ్ తీసుకోవాలి. ఆ ఫారమ్‌పై రూ. 2 నాన్-జ్యుడీషియల్ స్టాంపును అంటించాలి. ఫారమ్‌లో ఆస్తి సర్వే నంబర్, అది ఉన్న ప్రాంతం, వైశాల్యం , మీ చిరునామాను స్పష్టంగా నమోదు చేయాలి. మీ అడ్రస్ ప్రూఫ్ (ఆధార్ లేదా ఓటర్ ఐడి) కాపీని జత చేయాలి. పూర్తి చేసిన దరఖాస్తును సబ్-రిజిస్ట్రార్ కార్యాలయంలో సమర్పించాలి. అన్ని వివరాలు సరిచూసుకున్న తర్వాత, సుమారు 20 నుండి 30 రోజుల్లో మీకు సర్టిఫికేట్ అందుతుంది.

నేటి కాలంలో ఆస్తి మోసాలు పెరుగుతున్నందున, బిల్డర్ లేదా యజమాని నుండి ఇల్లు కొనే ముందే ఈ సర్టిఫికేట్ చెక్ చేసుకోవడం అత్యంత శ్రేయస్కరం.

Also Read: ఆకాశాన్ని తాకుతున్న పసిడి, వెండి ధరలు!