కర్ణాటక రాజధాని , దేశంలోని ప్రధాన ఐటీ కేంద్రంగా పేరొందిన బెంగళూరులో హోటళ్లు, రెస్టారెంట్లు నిరవధికంగా మూతపడనున్నాయి. వాణిజ్య ఎల్పీజీ గ్యాస్ సిలిండర్ల సరఫరాలో అనూహ్యంగా ఏర్పడిన అంతరాయం కారణంగా ఈ నిర్ణయం తీసుకున్నట్లు బెంగళూరు హోటల్ యజమానుల సంఘం ప్రకటించింది. మంగళవారం (మార్చి 10) నుంచి ఈ బంద్ అమల్లోకి రానుంది.
ప్రస్తుతం పశ్చిమాసియాలో కొనసాగుతున్న యుద్ధ ఉద్రిక్తతలు మరియు అంతర్జాతీయ సరఫరా వ్యవస్థలో ఏర్పడిన ఆటంకాల కారణంగా చమురు దిగుమతులు తగ్గిపోయాయని సమాచారం. ఈ ప్రభావం వాణిజ్య గ్యాస్ సరఫరాపై కూడా పడింది. గ్యాస్ అందుబాటులో లేకపోవడంతో నగరంలోని అనేక హోటళ్లు, రెస్టారెంట్లు వంటశాలలను నిర్వహించడంలో తీవ్ర ఇబ్బందులు ఎదుర్కొంటున్నాయి.
సరఫరా అంతగా లేదు..
చమురు కంపెనీలు గతంలో దేశంలో సుమారు 70 రోజుల వరకు గ్యాస్ నిల్వలు ఉన్నాయని హామీ ఇచ్చినప్పటికీ, క్షేత్రస్థాయిలో మాత్రం సరఫరా నిలిచిపోయిందని హోటల్ యజమానులు చెబుతున్నారు. గ్యాస్ లేకుండా వేలాది మందికి ప్రతిరోజూ ఆహారం తయారు చేయడం అసాధ్యమని, అందుకే గత్యంతరం లేక బంద్ నిర్ణయం తీసుకోవాల్సి వచ్చిందని వారు తెలిపారు.
ఈ బంద్ నిర్ణయం బెంగళూరులోని సాధారణ ప్రజలపై భారీ ప్రభావం చూపే అవకాశం ఉంది. ముఖ్యంగా బ్యాచిలర్లు, విద్యార్థులు, ఉద్యోగులు ఎక్కువగా హోటల్ ఆహారంపైనే ఆధారపడుతుంటారు. ఐటీ రంగం మరియు ఇతర పరిశ్రమల్లో పనిచేసే లక్షలాది మంది ఉద్యోగులకు ఇది పెద్ద సమస్యగా మారే అవకాశముంది.
Also Read: “ఫ్లవర్ కాదు ఫైర్” డైలాగ్ ముందుగా నేనే చెప్పా .. దానిని సుకుమార్ వాడుకున్నారన్న మంచు లక్ష్మి
ఆహార సంక్షోభం తలెత్తే ఛాన్స్..
హోటళ్లు మూతపడితే నగరంలో తాత్కాలిక ఆహార సంక్షోభం తలెత్తే పరిస్థితి ఉందని నిపుణులు అభిప్రాయపడుతున్నారు. ముఖ్యంగా ఐటీ కంపెనీలు అధికంగా ఉన్న ప్రాంతాల్లో పనిచేసే ఉద్యోగులు తీవ్ర ఇబ్బందులు ఎదుర్కొనే అవకాశం ఉంది.
ఈ పరిస్థితిని దృష్టిలో ఉంచుకుని కేంద్ర ప్రభుత్వం మరియు పెట్రోలియం శాఖ తక్షణమే జోక్యం చేసుకుని వాణిజ్య గ్యాస్ సరఫరాను పునరుద్ధరించాలని హోటల్ యజమానులు డిమాండ్ చేస్తున్నారు. ప్రభుత్వం నుంచి స్పష్టమైన హామీ లభించి, గ్యాస్ సిలిండర్ల పంపిణీ మళ్లీ సాధారణ స్థితికి వచ్చే వరకు సమ్మెను కొనసాగిస్తామని వారు స్పష్టం చేశారు.
ఈ పరిణామం నగరంలోని ఆర్థిక కార్యకలాపాలపై కూడా ప్రభావం చూపే అవకాశం ఉందని భావిస్తున్నారు. హోటల్ రంగంతో పాటు పర్యాటక రంగం, చిన్న వ్యాపారాలు, ఆహార సరఫరా సేవలు కూడా ఈ పరిస్థితి వల్ల నష్టపోయే అవకాశం ఉందని వ్యాపార వర్గాలు చెబుతున్నాయి.
