రష్యాలో ఉద్యోగాలు ఇప్పిస్తామని నమ్మించి తెలంగాణకు చెందిన పలువురు యువకులను అక్కడికి తీసుకెళ్లి రష్యా సైన్యంలోకి రిక్రూట్ చేసినట్లు ఆరోపణలు వెలుగులోకి వచ్చాయి. తెలంగాణకు చెందిన కనీసం 20 మంది ఈ రిక్రూట్‌మెంట్ నెట్‌వర్క్ బారిన పడినట్లు సమాచారం. వీరిలో కొందరు స్వదేశానికి తిరిగి రాగా.. మరికొందరు రష్యాలోనే చిక్కుకుపోయారు. మరో నలుగురిని ఉక్రెయిన్‌పై రష్యా తరఫున యుద్ధానికి పంపినట్లు తెలుస్తోంది.
సివిలియన్ ఉద్యోగాల పేరుతో..
కుటుంబ సభ్యుల ఫిర్యాదుల ప్రకారం.. విదేశాల్లో ఉద్యోగాల కోసం చూస్తున్న యువకులను ఏజెంట్లు సంప్రదించారు. రష్యాలో కుక్స్, క్లీనర్లు, గార్డెనర్లు, మెకానిక్‌లు, సపోర్ట్ స్టాఫ్, మాన్యువల్ వర్కర్లుగా ఉద్యోగాలు ఇప్పిస్తామని నమ్మించారు.
ధర్పల్లి మండలం దమ్మన్నపేటకు చెందిన మెగావత్ ప్రకాశ్ అనే యువకుడు కూడా ఇదే విధంగా రష్యా వెళ్లినట్లు సమాచారం. వీసా, ప్రయాణ ఖర్చుల కోసం రామడుగుకు చెందిన మాధవరావుకు రూ.2.4 లక్షలు చెల్లించినట్లు కుటుంబ సభ్యులు తెలిపారు.
రష్యా వెళ్లిన ప్రకాశ్ అక్కడ ఓ ప్రైవేట్ కంపెనీలో సుమారు నాలుగు నెలలు పనిచేశాడు. అయితే ఆ కంపెనీ మూతపడింది. దీంతో మాధవరావు రష్యాలోని ఏజెంట్లు ఒడ్డె యల్లయ్య, టేలు కృష్ణల ద్వారా మరో ఉద్యోగం ఇప్పిస్తామని చెప్పి మరో రూ.50 వేల వరకు డిమాండ్ చేసినట్లు ఆరోపణలు ఉన్నాయి.
ఆ తర్వాత ప్రకాశ్‌ను గౌరవ్ చౌదరి వద్దకు తీసుకెళ్లగా.. అతడి ద్వారా రష్యా సైన్యంలోకి రిక్రూట్ చేసినట్లు ఆరోపణలు ఉన్నాయి.
ఉద్యోగం బదులు మిలిటరీ ట్రైనింగ్
రష్యా చేరుకున్న తర్వాత కొంతమంది యువకులకు తాము ముందుగా చెప్పిన సివిలియన్ ఉద్యోగాలు ఇవ్వకుండా సైనిక శిక్షణ ఇచ్చినట్లు కుటుంబ సభ్యులు ఆరోపించారు. స్వదేశానికి తిరిగి వచ్చిన వారు చెప్పిన వివరాల ప్రకారం.. ఎక్కువ సమయం శారీరక శిక్షణ, సరైన ఆహారం లేకపోవడం, తగినంత నిద్ర లేకపోవడం, సరైన వసతి సౌకర్యాలు లేకపోవడం వంటి పరిస్థితులను ఎదుర్కొన్నట్లు తెలిపారు.
కొంతమంది యువకులు తమ పరిస్థితిని వివరిస్తూ వీడియోలు, మెసేజ్‌ల ద్వారా సహాయం కోరారు. స్వదేశానికి తిరిగి వచ్చిన కస్తూరి తిరుపతి మాట్లాడుతూ.. “ఇంట్లో అప్పులు తీర్చాల్సి ఉండటంతో ఏజెంట్లను నమ్మి వెళ్లాం. మోసపోయాం” అని తెలిపినట్లు సమాచారం.
ఈ వ్యవహారంలో నిజామాబాద్, కామారెడ్డి, సిరిసిల్ల జిల్లాలకు చెందిన యువకులు ఉన్నట్లు తెలుస్తోంది.
కొందరు తిరిగి రాగా.. మరికొందరు ఎదురుచూపులు
తదుపరి జరిగిన ఓ రీపాట్రియేషన్ ప్రయత్నంలో గుర్తించిన 16 మందిలో ముగ్గురు ఇప్పటికే స్వదేశానికి తిరిగి వచ్చారు. బండ లింగాపూర్‌కు చెందిన శేఖర్, కేశాపూర్‌కు చెందిన రాజశేఖర్, ధర్పల్లికి చెందిన తిరుపతి భారత్‌కు తిరిగి వచ్చినట్లు సమాచారం. మరో 13 మంది స్వదేశానికి రావడానికి ఎదురుచూస్తున్నట్లు తెలుస్తోంది.
ఏజెంట్ అరెస్ట్
ఈ వ్యవహారంలో నిజామాబాద్ పోలీసులు గౌరవ్ చౌదరి అనే 34 ఏళ్ల వ్యక్తిని అరెస్ట్ చేశారు. అతడు ఉత్తరప్రదేశ్‌లోని కార్వార్‌కు చెందిన వ్యక్తిగా పోలీసులు గుర్తించారు. రష్యా ఆర్మీ రిక్రూట్‌మెంట్ ఏజెన్సీ తన బ్యాంకు ఖాతాలను ఉపయోగించుకుందని గౌరవ్ చౌదరి చెప్పినట్లు పోలీసులు తెలిపారు. అయితే అతడు ఆ ఏజెన్సీతో కలిసి ఈ వ్యవహారంలో పనిచేశాడా అనే విషయంపై పోలీసులు దర్యాప్తు చేస్తున్నారు.
ఇదిలా ఉండగా.. నిజామాబాద్ ఎంపీ ధర్మపురి అరవింద్ 16 మంది యువకులను స్వదేశానికి తీసుకురావాలని కోరుతూ కేంద్ర విదేశాంగ మంత్రి ఎస్. జైశంకర్‌కు లేఖ రాశారు. కొంతమంది యువకుల విడుదలకు సహకరించినందుకు జైశంకర్‌తో పాటు భారత రాయబార కార్యాలయానికి ఆయన కృతజ్ఞతలు తెలిపారు.
రష్యాలో రక్షణ రంగానికి సంబంధించిన ఉద్యోగాల పేరుతో వచ్చే ఆఫర్ల విషయంలో భారతీయులు అప్రమత్తంగా ఉండాలని కేంద్ర ప్రభుత్వం సూచించింది. గుర్తింపు లేని ఏజెంట్లను నమ్మవద్దని, రష్యా వెళ్లే ముందు రిక్రూట్‌మెంట్ వివరాలు, ఉద్యోగ ఒప్పందాలు, ఏజెన్సీ గుర్తింపు వంటి అంశాలను పూర్తిగా ధృవీకరించుకోవాలని సూచించింది.
