Suryapet Police: పోలీస్ అమరవీరుల సంస్మరణ దినోత్సవం, పోలీస్ ఫ్లాగ్ డే సందర్భంగా సూర్యాపేట జిల్లా పోలీసుల ఆధ్వర్యంలో వివిధ పోటీలు నిర్వహించనున్నారు. విద్యార్థులు, యువత, పోలీసు సిబ్బంది, ప్రజలు పెద్ద సంఖ్యలో ఈ పోటీల్లో పాల్గొనాలని జిల్లా ఎస్పీ కె. నరసింహ, ఐపీఎస్ సూచించారు.
విద్యార్థులకు ఆన్‌లైన్ వ్యాసరచన పోటీలు
విద్యార్థుల కోసం తెలుగు, ఇంగ్లీష్, ఉర్దూ భాషల్లో ఆన్‌లైన్ వ్యాసరచన పోటీలు నిర్వహించనున్నారు. 500 పదాలకు మించకుండా వ్యాసాలు రాయాల్సి ఉంటుంది. విద్యార్థులు తమ వ్యాసాలను అక్టోబర్ 28, 2026లోగా సమర్పించాలి.
ఇంటర్మీడియట్ వరకు చదువుతున్న విద్యార్థులకు పోలీసుల పాత్ర, డ్రగ్స్ నివారణ వంటి అంశాలను వ్యాసరచనకు కేటాయించారు. డిగ్రీ, ఆపై చదువుతున్న విద్యార్థులకు పోలీస్ మీడియా, డ్రగ్స్ రహిత తెలంగాణ వంటి అంశాలపై వ్యాసాలు రాయాల్సి ఉంటుంది.
పోటీలో పాల్గొనే విద్యార్థులు రిజిస్ట్రేషన్ చేసుకుని, రాసిన వ్యాసాన్ని ఫోటో లేదా PDF రూపంలో ఆన్‌లైన్‌లో అప్లోడ్ చేయాలి. మూడు భాషల్లో ప్రథమ, ద్వితీయ, తృతీయ బహుమతులు అందజేయనున్నారు.
పోలీసు సిబ్బందికి కూడా వ్యాసరచన పోటీలు
పోలీసు సిబ్బందికి కూడా తెలుగు, ఇంగ్లీష్, ఉర్దూ భాషల్లో ఆన్‌లైన్ వ్యాసరచన పోటీలు నిర్వహించనున్నారు. 500 పదాలకు మించకుండా వ్యాసాలు రాయాల్సి ఉంటుంది. అక్టోబర్ 27, 2026లోగా వ్యాసాలను సమర్పించాలి.
ఎస్ఐ, ఆపై స్థాయి అధికారులకు ప్రజల సమస్యలు, పోలీసు వ్యవస్థను బలోపేతం చేయడం వంటి అంశాలను కేటాయించారు. కానిస్టేబుల్ నుంచి ఎస్ఐ స్థాయి సిబ్బందికి ప్రజాస్వామ్య వ్యవస్థలో పోలీసుల నుంచి ప్రజలు ఆశించే సేవలు, పోలీసు సిబ్బంది పాత్ర వంటి అంశాలపై వ్యాసాలు రాయాల్సి ఉంటుంది.
షార్ట్ ఫిల్మ్, ఫోటోగ్రఫీ పోటీలు
తెలంగాణ రాష్ట్ర పోలీసుల సేవలు, ప్రజా భద్రత, నేర నివారణ, కమ్యూనిటీ పోలీసింగ్, పోలీసు అమరవీరుల త్యాగాలు వంటి అంశాలపై షార్ట్ ఫిల్మ్, ఫోటోగ్రఫీ పోటీలు నిర్వహించనున్నారు.
షార్ట్ ఫిల్మ్ గరిష్టంగా మూడు నిమిషాల నిడివితో ఉండాలి. తెలుగు, ఇంగ్లీష్, ఉర్దూ భాషల్లో రూపొందించిన షార్ట్ ఫిల్మ్‌లను పోటీకి సమర్పించవచ్చు. పోలీసుల ప్రతిభను ప్రతిబింబించే ఫోటోలను కూడా పోటీకి పంపించవచ్చు.
షార్ట్ ఫిల్మ్, ఫోటోగ్రఫీ పోటీలకు అక్టోబర్ 30, 2026 చివరి తేదీగా నిర్ణయించారు. ఉత్తమ మూడు షార్ట్ ఫిల్మ్‌లు, మూడు ఫోటోలను ఎంపిక చేసి రాష్ట్రస్థాయి ఎంపికకు పంపించనున్నారు. ఎంపికైన వారికి మెరిట్ సర్టిఫికెట్లు అందజేయనున్నారు.
పెద్ద సంఖ్యలో పాల్గొనాలి: ఎస్పీ
పోలీసు అమరవీరుల త్యాగాలను స్మరించుకోవడం ప్రతి ఒక్కరి బాధ్యత అని జిల్లా ఎస్పీ కె. నరసింహ తెలిపారు. పోలీసు శాఖ సేవలను ప్రజలకు మరింత చేరువ చేయడంలో ఇలాంటి కార్యక్రమాలు కీలక పాత్ర పోషిస్తాయని పేర్కొన్నారు.
విద్యార్థులు తమలోని సృజనాత్మకతను ప్రదర్శించాలని, పోలీసు సిబ్బంది తమ నైపుణ్యాలను మెరుగుపరుచుకోవాలని, ప్రజలు కూడా పోలీసు శాఖకు సంబంధించిన అంశాల్లో తమ ప్రతిభను చాటుకోవాలని ఎస్పీ సూచించారు. పోలీస్ ఫ్లాగ్ డే సందర్భంగా నిర్వహించే అన్ని పోటీలు, కార్యక్రమాల్లో విద్యార్థులు, యువత, పోలీసు అధికారులు, సిబ్బంది, ప్రజలు పెద్ద సంఖ్యలో పాల్గొనాలని ఆయన కోరారు.
