NTR | తెలుగుజాతి ఆత్మగౌరవానికి ప్రతీకగా నిలిచిన నందమూరి తారక రామారావు పేరు చరిత్ర ఉన్నంతకాలం ప్రజల గుండెల్లో నిలిచిపోతుందని ఆంధ్రప్రదేశ్ ముఖ్యమంత్రి నారా చంద్రబాబు నాయుడు అన్నారు. ఎన్టీఆర్కు భారతరత్న పురస్కారం ఇవ్వాలన్నది కోట్లాది తెలుగు ప్రజల ఆకాంక్ష అని స్పష్టం చేశారు. ఎన్టీఆర్ 103వ జయంతి సందర్భంగా నిర్వహించిన మహానాడులో చంద్రబాబు ఆయన సేవలను స్మరించుకున్నారు. దేశ రాజకీయాల్లోనే కాదు, తెలుగు ప్రజల సామాజిక జీవితంలో కూడా ఎన్టీఆర్ ఒక సంచలన మార్పుకు నాంది పలికారని చంద్రబాబు పేర్కొన్నారు. కేవలం తొమ్మిది నెలల్లో పార్టీని అధికారంలోకి తీసుకురావడం ఆయనకే సాధ్యమైన అరుదైన ఘనత అని చెప్పారు.
Read Also : సీబీఎన్ అంటే బ్రాండ్.. మహానాడులో లోకేశ్ వ్యాఖ్యలు..
సినీరంగంలోనూ ఎన్టీఆర్కు ప్రత్యామ్నాయం లేరని, ఆయన పోషించిన పాత్రలను మళ్లీ ఆ స్థాయిలో చేయాలంటే ఎన్టీఆర్ మళ్లీ పుట్టాల్సిందేనని వ్యాఖ్యానించారు. మహానాడులో ఎన్టీఆర్కు భారతరత్న ప్రకటించాలని కోరుతూ పార్టీ నేతలు ఏకగ్రీవంగా తీర్మానం చేశారు. రాష్ట్రానికి, దేశానికి ఎన్టీఆర్ అందించిన సేవలను గుర్తించి దేశ అత్యున్నత పురస్కారంతో గౌరవించాలని డిమాండ్ చేశారు. ఈ సందర్భంగా టీడీపీ సిద్ధాంతాలను కూడా చంద్రబాబు ప్రస్తావించారు. “సమాజమే దేవాలయం.. ప్రజలే దేవుళ్లు” అనే ఎన్టీఆర్ ఆలోచన ఇప్పటికీ పార్టీకి మార్గదర్శకమని చెప్పారు. మహిళలకు 33 శాతం రాజకీయ ప్రాతినిధ్యం కల్పించాలన్న నిర్ణయం కూడా ఎన్టీఆర్ ఆశయాల స్ఫూర్తితోనే తీసుకున్నదని, ఆ ప్రకటనను మంత్రి నారా లోకేశ్ మహానాడులో వెల్లడించారని చంద్రబాబు గుర్తుచేశారు. సమాజమే దేవాలయం, ప్రజలే దేవుళ్లు అనేది టీడీపీ సిద్ధాంతమని చెప్పారు. ఎన్టీఆర్ ఇచ్చిన ఆ సిద్ధాంతం శాశ్వతంగా కొనసాగుతుందన్నారు. పార్టీని స్థాపించిన 9 నెలల్లోనే అధికారాన్ని చేజిక్కించుకోవడం ఎన్టీఆర్కు తప్ప చరిత్రలో మరెవరికీ సాధ్యపడలేదన్నారు. సినీ హిస్టరీలో ఆయనకు ప్రత్యామ్నాయమే లేదన్న చంద్రబాబు.. మళ్లీ అలాంటి పాత్రలు చేయాలంటే ఎన్టీఆరే మళ్లీ పుట్టాలన్నారు.
Read Also : బోత్ ఆర్ నాట్ సేమ్.. మహానాడు సభలో వైసీపీపై నిప్పులు చెరిగిన చంద్రబాబు..!
ఇదిలా ఉండగా.. ఎన్టీఆర్ జయంతి సందర్భంగా చంద్రబాబు, ఆయన కుటుంబ సభ్యులు సోషల్ మీడియా వేదికగా భావోద్వేగ సందేశాలు పంచుకున్నారు. “కృషి ఉంటే మనుషులు ఋషులవుతారు అనే మాటకు ఎన్టీఆర్ నిలువెత్తు నిదర్శనం. సినీ, రాజకీయ రంగాల్లో ధృవతారగా వెలిగిన ఆయన తెలుగు ప్రజల జీవితాల్లో మార్పులు తీసుకొచ్చిన ఆధునిక సంఘసంస్కర్త” అని చంద్రబాబు తన పోస్టులో పేర్కొన్నారు. మంత్రి నారా లోకేశ్ కూడా తన తాతను స్మరించుకుంటూ భావోద్వేగ పోస్టు చేశారు. “ప్రపంచానికి తెలుగుజాతి గొప్పతనాన్ని చాటిచెప్పిన మహనీయుడు ఎన్టీఆర్. అణగారిన వర్గాలకు అండగా నిలిచి సంక్షేమానికి కొత్త దిశ చూపించారు. తాతా.. మీరే మాకు నిత్యస్ఫూర్తి” అని లోకేశ్ పేర్కొన్నారు. ఎన్టీఆర్ కుమార్తె నారా భువనేశ్వరి కూడా తన తండ్రి జ్ఞాపకాలను గుర్తుచేసుకున్నారు. మూడు తరాలుగా ఎన్టీఆర్పై ప్రజల్లో అదే గౌరవం కొనసాగుతోందని, మాట ఇచ్చి నిలబెట్టుకునే నిబద్ధతే ఆయనను ప్రజలకు “అన్నగారు”గా మార్చిందని ఆమె తెలిపారు. ఎన్టీఆర్ జయంతి సందర్భంగా రాష్ట్రవ్యాప్తంగా టీడీపీ శ్రేణులు ఆయనకు నివాళులు అర్పించాయి. పార్టీ కార్యాలయాలు, ఎన్టీఆర్ విగ్రహాల వద్ద ప్రత్యేక కార్యక్రమాలు నిర్వహించారు.
Read Also : ఏపీలో మండుతున్న ఎండలతో అప్రమత్తమైన ప్రభుత్వం.. సీఎం చంద్రబాబు కీలక ఆదేశాలు..
