తెలుగు సినీ పరిశ్రమలో జర్నలిస్టుల సంక్షేమం కోసం నిరంతరం శ్రమిస్తున్న తెలుగు ఫిల్మ్ జర్నలిస్ట్ అసోసియేషన్ (TFJA) కు యువ నిర్మాత వంశీ నందిపాటి తన వంతు అండగా నిలిచారు. అసోసియేషన్ చేపడుతున్న వివిధ సంక్షేమ కార్యక్రమాలను అభినందిస్తూ, తన వంతు సహాయంగా ఆయన విరాళాన్ని అందించారు.
హైదరాబాద్లో జరిగిన ఒక ప్రత్యేక భేటీలో నిర్మాత వంశీ నందిపాటి, TFJA అధ్యక్షుడు వై.జె. రాంబాబు గారిని కలిసి విరాళానికి సంబంధించిన చెక్కును అందజేశారు. ఈ సందర్భంగా ఆయన మాట్లాడుతూ.. సినిమా రంగానికి, ప్రేక్షకులకు మధ్య వారధిగా ఉంటూ పరిశ్రమ అభివృద్ధికి తోడ్పడుతున్న జర్నలిస్టుల పాత్ర ఎంతో కీలకమైందని కొనియాడారు.
Also Read: తమ బంధాన్ని అఫీషియల్గా ప్రకటించిన విజయ్-రష్మిక.. పెళ్లికి ‘వెడ్డింగ్ ఆఫ్ విరోష్’ పేరు
“TFJA ఆధ్వర్యంలో జర్నలిస్టుల సంక్షేమం కోసం చేపడుతున్న కార్యక్రమాలు నిజంగా ప్రశంసనీయం. సినీ జర్నలిస్టుల కష్టాన్ని గుర్తించి, వారి అభివృద్ధికి ఇండస్ట్రీలోని ప్రముఖులు తమ వంతు సహకారం అందించాలి” అని వంశీ నందిపాటి ఈ సందర్భంగా ఆకాంక్షించారు.
TFJA కృతజ్ఞతలు:
వంశీ నందిపాటి చూపిన ఈ చొరవకు TFJA సభ్యులు హృదయపూర్వక కృతజ్ఞతలు తెలియజేస్తూ, అసోసియేషన్ తరఫున ఆయనను ఘనంగా అభినందించారు. యువ నిర్మాతల నుంచి ఇలాంటి ప్రోత్సాహం లభించడం అసోసియేషన్ కార్యకలాపాలకు మరింత బలాన్నిస్తుందని వారు పేర్కొన్నారు. వంశీ నందిపాటి లాంటి నిర్మాతలు పరిశ్రమలోని ప్రతి విభాగాన్ని గౌరవిస్తూ ముందుకు రావడం అభినందనీయమని ప్రతినిధులు కొనియాడారు.
