కిచెన్‌లో బొద్దింకలు, ఈగలు.. కాంచీ కేఫేపై ఫుడ్ సేఫ్టీ అధికారుల హెచ్చరిక

సైబరాబాద్‌లో ఫుడ్ సేఫ్టీ తనిఖీలు

ఆహార భద్రత, పరిశుభ్రత ప్రమాణాలను మెరుగుపర్చే లక్ష్యంతో సైబరాబాద్ మున్సిపల్ కార్పొరేషన్ (CMC) ఫుడ్ సేఫ్టీ బృందాలు ప్రత్యేక తనిఖీలు చేపట్టాయి. ఈ క్రమంలో మణికొండలోని కాంచీ కేఫే మరియు నల్లగండ్లలోని కోడికూర చిట్టిగారె రెస్టారెంట్లలో పలు లోపాలను అధికారులు గుర్తించారు.

పరిశుభ్రత, ఆహార నిల్వ, ప్యాకేజింగ్, డాక్యుమెంటేషన్ వంటి అంశాల్లో లోపాలు ఉన్నట్లు గుర్తించిన అధికారులు రెండు సంస్థలకు ఇంప్రూవ్‌మెంట్ నోటీసులు జారీ చేశారు.

కాంచీ కేఫేలో బూజు పట్టిన కాలీఫ్లవర్

జూన్ 22న పుప్పాలగూడ, మణికొండలోని కాంచీ కేఫేలో నిర్వహించిన తనిఖీల్లో కొన్ని సానుకూల అంశాలు కనిపించాయి. రెస్టారెంట్‌లో చెల్లుబాటు అయ్యే FSSAI లైసెన్స్ ఉండటంతో పాటు సిబ్బంది వ్యక్తిగత పరిశుభ్రత పాటిస్తున్నట్లు అధికారులు గుర్తించారు.

అయితే పలు ఆందోళనకర అంశాలు కూడా బయటపడ్డాయి.

అధికారుల పరిశీలనలో:

• వంటగది, స్టోర్‌రూమ్ మధ్య తెరిచి ఉన్న చెత్త బుట్టలు కనిపించాయి.
• స్టోర్‌రూమ్ పైకప్పుపై దుమ్ము పేరుకుపోయింది.
• కూరగాయలు కోసే ప్రాంతంలో నీరు నిల్వ ఉండటం గుర్తించారు.
• కాలీఫ్లవర్‌పై బూజు పెరిగినట్లు గుర్తించారు.
• డ్రైనేజీ ప్రాంతంలో దుర్వాసన వస్తోంది.
• ఫ్రిజ్‌లో నిల్వ ఉంచిన పిండిపై సరైన లేబుల్స్ లేవు.
• వంటగది, స్టోర్‌రూమ్‌లో ఈగలు, బొద్దింకలు కనిపించాయి.
• మెడికల్ ఫిట్‌నెస్, పెస్ట్ కంట్రోల్, వాటర్ టెస్టింగ్ రికార్డులు అందుబాటులో లేవు.

ఈ నేపథ్యంలో పరిశుభ్రత మెరుగుపరచాలని, ఆహార పదార్థాలపై సరైన లేబులింగ్ అమలు చేయాలని అధికారులు ఆదేశించారు.

హైజీన్ అంచనాలో కాంచీ కేఫేకు 94 మార్కులకు గాను 56 మార్కులు (60%) లభించాయి.

కోడికూర చిట్టిగారెలో లేబుల్ లేని ఆహార పదార్థాలు

నల్లగండ్లలోని కోడికూర చిట్టిగారెలో నిర్వహించిన తనిఖీల్లో కూడా పలు లోపాలు బయటపడ్డాయి.

అధికారుల ప్రకారం:

• ముడి చికెన్, మామిడి పల్ప్, డెజర్ట్స్ వంటి పదార్థాలు సరైన లేబుల్స్ లేకుండా నిల్వ ఉంచారు.
• లేబుల్ లేని పదార్థాలను అక్కడికక్కడే అధికారులు తొలగించారు.
• వంటకు ఉపయోగించే నీటి నాణ్యత పరీక్ష నివేదికలు అందుబాటులో లేవు.
• చిల్లర్ ఎక్కువగా నింపడంతో సరైన శీతలీకరణ జరగడం లేదు.
• ఇద్దరు ఫుడ్ హ్యాండ్లర్ల గోర్లు పొడవుగా ఉన్నట్లు గుర్తించారు.
• గ్రైండింగ్ ఏరియా పైకప్పుపై దుమ్ము పేరుకుపోయింది.
• డ్రైనేజీ ప్రాంతంలో ఆహార వ్యర్థాలు తొలగించకుండా ఉంచారు.
• కిచెన్ పైకప్పు జిడ్డుగా ఉండటం వల్ల తక్షణ శుభ్రపరిచే చర్యలు అవసరమని అధికారులు సూచించారు.

ఈ రెస్టారెంట్‌కు కూడా పరిశుభ్రత, డాక్యుమెంటేషన్, నిల్వ విధానాల్లో మార్పులు చేయాలని సూచిస్తూ ఇంప్రూవ్‌మెంట్ నోటీసు జారీ చేశారు.

హైజీన్ అంచనాలో కోడికూర చిట్టిగారెకు 98 మార్కులకు గాను 60 మార్కులు (62%) వచ్చాయి.

ప్రజారోగ్యమే లక్ష్యం

సైబరాబాద్ మున్సిపల్ కార్పొరేషన్ ఫుడ్ సేఫ్టీ బృందాలు నగరవ్యాప్తంగా ఇటువంటి తనిఖీలు కొనసాగిస్తామని వెల్లడించాయి. ప్రజలకు నాణ్యమైన, సురక్షితమైన ఆహారం అందించడం ప్రధాన లక్ష్యమని పేర్కొన్నాయి.

“Safe Food. Better Hygiene. Healthier Cyberabad” నినాదంతో చేపడుతున్న ఈ డ్రైవ్ ద్వారా రెస్టారెంట్లు, హోటళ్లలో ఆహార భద్రతా ప్రమాణాలు మరింత మెరుగుపడతాయని అధికారులు ఆశాభావం వ్యక్తం చేస్తున్నారు.