Eggs
హైదరాబాద్: తక్కువ ధరలో ఎక్కువ ప్రోటీన్ ఇచ్చే అద్భుతమైన ఆహారం గుడ్డు(Eggs). అందుకే వైద్యులు రోజుకో గుడ్డు తినమని సలహా ఇస్తారు. అయితే, గుడ్డులో ఉండే పోషకాలను మనం పొందాలి అంటే దాన్ని వండే విధానంలోనే కాదు, వండడానికి ముందు చేసే శుభ్రతలో కూడా శ్రద్ధ వహించాలి. ముఖ్యంగా లోకల్ మార్కెట్లలో కొనే గుడ్ల విషయంలో మనం చేసే చిన్న పొరపాటు ప్రాణాంతక బ్యాక్టీరియా మన శరీరంలోకి చేరడానికి కారణం కావచ్చు.
శుభ్రం చేయడం:
చాలామంది ప్యాకేజ్డ్ గుడ్లనే కొంటుంటారు. ఇవి సాధారణంగా శుభ్రం చేసి, శానిటైజ్ చేసి అమ్ముతారు. కానీ చిన్న షాపుల్లో లేదా లోకల్ మార్కెట్లలో కొనే గుడ్లు నేరుగా ఫామ్ నుంచి వస్తాయి. వీటిపై దుమ్ము, కోడి ఈకలు, రెట్టల అవశేషాలు ఉండే అవకాశం ఉంది. వీటిలో సాల్మోనెల్లా, ఈ-కోలి వంటి ప్రమాదకరమైన బ్యాక్టీరియాలు ఉంటాయి. ఇవి పొట్ట నొప్పి, విరేచనాలు, జ్వరం వంటి ఇన్ఫెక్షన్లకు దారితీస్తాయి.
కడగడం:
గుడ్డు (Eggs)పెంకు పైకి గట్టిగా కనిపించినా, దానిపై కంటికి కనిపించని సూక్ష్మ రంధ్రాలు (Pores) ఉంటాయి. మనం గుడ్లను సరిగ్గా హ్యాండిల్ చేయకపోతే పెంకుపై ఉండే బ్యాక్టీరియా ఆ రంధ్రాల ద్వారా లోపలికి చేరుతుంది. అందుకే గుడ్లను ఉడికించే ముందు లేదా పగలగొట్టే ముందు నీటితో సున్నితంగా కడగాలి. దీనివల్ల పెంకుపై ఉండే మురికి మన చేతులకు లేదా వంట పాత్రలకు అంటుకోకుండా ఉంటుంది.
నిల్వ చేయటం:
చాలామంది గుడ్లను మార్కెట్ నుంచి తెచ్చిన వెంటనే కడిగి ఫ్రిజ్లో పెడుతుంటారు. ఇది చాలా తప్పు. గుడ్డు పెంకుపై ‘బ్లూమ్’ (Bloom) అనే సహజమైన రక్షణ పొర ఉంటుంది. ఇది బ్యాక్టీరియా లోపలికి వెళ్లకుండా రక్షిస్తుంది. మీరు ముందే కడిగితే ఆ పొర పోతుంది. కాబట్టి, వాడే ముందు మాత్రమే గుడ్లను కడగాలి. అలాగే ఫ్రిజ్ డోర్ లో కాకుండా లోపలి షెల్ఫ్ లో ఉంచితే ఉష్ణోగ్రత మారకుండా గుడ్లు తాజాగా ఉంటాయి.
తాజాదనం:
మీ దగ్గర ఉన్న గుడ్డు తాజాగా ఉందో లేదో తెలియాలంటే ‘ఫ్లోట్ టెస్ట్’ చేయండి. ఒక గ్లాసు నీటిలో గుడ్డు వేస్తే అది అడుగున ఉంటే తాజాగా ఉన్నట్లు, నీటిపై తేలితే అది పాడైపోయినట్లు గుర్తించాలి.
అపరిశుభ్రమైన గుడ్ల వల్ల వచ్చే ఫుడ్ బోర్న్ ఇన్ఫెక్షన్ల పట్ల జాగ్రత్తగా ఉండండి. సాధ్యమైనంత వరకు నాణ్యమైన ప్యాకేజ్డ్ గుడ్లను ఎంచుకోండి లేదా లోకల్ గుడ్లను వాడేటప్పుడు జాగ్రత్తలు తప్పక పాటించండి.
