మెగ్నీషియం లోపం అంటే ఏమిటి? దాని లక్షణాలు, సహజ నివారణ మార్గాలు ఇవే!

Magnesium

హైదరాబాద్: ఆరోగ్యంగా ఉండాలంటే శరీరానికి అన్ని రకాల విటమిన్లు, ఖనిజ లవణాలు సరైన మోతాదులో అందడం చాలా ముఖ్యం. ఏ ఒక్క విటమిన్ లోపించినా శరీరం రకరకాల సంకేతాలను పంపిస్తుంది. మనం తరచుగా విటమిన్-డి లేదా బి12 గురించి వింటూ ఉంటాం కానీ, మన శరీరంలో అత్యంత కీలక పాత్ర పోషించే మెగ్నీషియం గురించి పెద్దగా పట్టించుకోం. నిజానికి ఎముకల పుష్టి నుంచి గుండె ఆరోగ్యం వరకు మెగ్నీషియం ఎంతో అవసరం. నిపుణుల సూచనల ప్రకారం.. మెగ్నీషియం లోపాన్ని ఎలా గుర్తించాలి? దాన్ని సహజంగా ఎలా భర్తీ చేసుకోవాలో ఇప్పుడు వివరంగా తెలుసుకుందాం.

మెగ్నీషియం(Magnesium) ఎందుకు అవసరం?
మెగ్నీషియం అనేది మన శరీరంలో వందలాది జీవక్రియలకు కారణం. ఇది కండరాల సంకోచ వ్యాకోచాలను నియంత్రిస్తుంది, నరాల పనితీరును మెరుగుపరుస్తుంది, న్యూరోట్రాన్స్మిటర్ల నిర్మాణానికి తోడ్పడుతుంది. ముఖ్యంగా గుండె లయ తప్పకుండా కొట్టుకోవడానికి, ఎముకల దృఢత్వానికి ఇది ఎంతో కీలకం.

కనిపించే లక్షణాలు:
విపరీతమైన అలసట: తగినంత విశ్రాంతి తీసుకున్నా, సరైన నిద్ర ఉన్నా.. ఏ పనీ చేయకపోయినా విపరీతమైన నీరసంగా, బలం లేకపోయినట్లు అనిపిస్తే అది మెగ్నీషియం లోపం కావొచ్చు.

మానసిక సమస్యలు: కారణం లేకుండా బాధగా అనిపించడం, చిన్న చిన్న విషయాలకే ఏడుపు రావడం, విపరీతమైన ఆందోళన కూడా ఈ లోపానికి సంకేతాలే. మెగ్నీషియం ఒత్తిడి హార్మోన్లను తగ్గించి మెదడును ప్రశాంతపరుస్తుంది. అది తగ్గినప్పుడు మానసికంగా చాలా వీక్ అవుతారు.

కండరాల నొప్పులు: కండరాలు పట్టేయడం , తిమ్మిర్లు రావడం వంటివి కూడా మెగ్నీషియం లోపం వల్ల సంభవిస్తాయి.

ప్రధాన కారణాలు:
మనం తీసుకునే ఆహారపు అలవాట్లే దీనికి ప్రధాన కారణం. జంక్ ఫుడ్, ప్రాసెస్డ్ ఫుడ్ ఎక్కువగా తీసుకోవడం, కెఫిన్ (కాఫీ, టీ) అతిగా తాగడం, రాత్రిపూట ఆలస్యంగా నిద్రపోవడం వల్ల శరీరంలో మెగ్నీషియం స్థాయిలు పడిపోతాయి.

సమస్యను తగ్గించుకునే మార్గాలు:
ఈ సమస్య నుంచి బయటపడటానికి 7 రోజుల పాటు ఈ క్రింది జాగ్రత్తలు పాటించండి.

పంచదార, కెఫిన్ వాడకాన్ని తగ్గించండి. రోజూ నానబెట్టిన గుమ్మడి గింజలు, ఒక అరటిపండు తప్పనిసరిగా తీసుకోండి. రాత్రి 10 గంటలకల్లా నిద్రపోయి, కనీసం 8 గంటల నిద్ర ఉండేలా చూసుకోండి. విటమిన్-డి కోసం ప్రతిరోజూ ఉదయం 20 నిమిషాల పాటు ఎండలో నడవండి. మానసిక ప్రశాంతత కోసం రోజూ 5 నిమిషాల పాటు లోతైన శ్వాస ప్రక్రియ చేయండి. ఉదయం బ్రేక్‌ఫాస్ట్‌లో ప్రోటీన్ ఎక్కువగా ఉండేలా చూసుకోండి.

ఈ జాగ్రత్తలను ఒక వారం పాటు పాటిస్తే మీలో మార్పు కనిపిస్తుంది. ఫలితం బాగుంటే దీనిని 6 వారాల పాటు కొనసాగించండి. అప్పటికీ మార్పు రాకపోతే వెంటనే డాక్టర్‌ను సంప్రదించడం మంచిది.

మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి