పిల్లలకు ఆకలి పెంచే మందులు ఇస్తున్నారా? దీనివలన కలిగే ప్రమాదాలు తెలుసా?

Medicines

హైదరాబాద్: పిల్లలకు అన్నం తినిపించడం తల్లిదండ్రులకు ఒక యుద్ధం లాంటిదే. పౌష్టికాహారం పెడితే ముఖం చాటేయడం, మారాం చేయడం చిన్నారులకు అలవాటు. ఇలా సరిగ్గా తినకపోవడం వల్ల పిల్లలు సన్నగా మారిపోతున్నారని ఆందోళన చెందే చాలా మంది తల్లిదండ్రులు, సొంతంగా మెడికల్ షాపులకు వెళ్లి ‘ఆకలి పెంచే మందులు’ (Appetite Stimulants) కొని వాడుతుంటారు. కానీ నిపుణులు ఈ పద్ధతి చాలా ప్రమాదకరమని హెచ్చరిస్తున్నారు.

సిరప్‌ల వల్ల కలిగే సైడ్ ఎఫెక్ట్స్:
పీడియాట్రిక్స్ అకాడమీలు పిల్లలకు ఇలాంటి మందులు (Medicines)ఇవ్వడాన్ని అస్సలు సమర్థించవు. ఈ సిరప్‌లలో ఉండే ‘సైప్రోహెప్టాడిన్’ అనే కెమికల్ వల్ల పిల్లల్లో అనేక సమస్యలు తలెత్తుతాయి. తరచూ తలనొప్పి, చిరాకు, అయోమయం కలగడం లేదా చర్మంపై దద్దుర్లు వంటి సమస్యలు వచ్చే అవకాశం ఉంది. అత్యంత ప్రమాదకరమైన విషయం ఏమిటంటే, ఇవి దీర్ఘకాలంలో పిల్లల కాలేయం (Liver) పై తీవ్ర ప్రభావం చూపుతాయి.

సహజంగా ఆకలి పెంచడం ఎలా?
మందుల జోలికి వెళ్లకుండా కొన్ని చిన్న మార్పులతో పిల్లల్లో ఆకలిని పెంచవచ్చు.

పిల్లలను తినమని వెంటపడకండి. దీనివల్ల వారికి ఆహారంపై విరక్తి కలుగుతుంది. బదులుగా కొత్త రకాల వంటకాలతో వారిని ఆకర్షించండి. భోజనం చేసేటప్పుడు మొబైల్ ఫోన్లు, టీవీలు చూడనివ్వకండి. దీనివల్ల వారు ఆహారంపై దృష్టి పెట్టరు. పిల్లలు రోజంతా యాక్టివ్‌గా ఉండేలా చూడండి. ఆటలు ఆడటం వల్ల కలిగే శారీరక శ్రమ వారికి సహజంగానే ఆకలిని కలిగిస్తుంది. బ్రేక్ ఫాస్ట్, లంచ్, డిన్నర్ ప్రతిరోజూ ఒకే సమయానికి ఉండేలా ప్లాన్ చేయండి. రాత్రి త్వరగా పడుకుని, ఉదయం త్వరగా లేవడం వల్ల జీర్ణక్రియ మెరుగుపడుతుంది.

డాక్టర్ సలహా లేకుండా ఎలాంటి సిరప్‌లు లేదా స్టెరాయిడ్లు పిల్లలకు వాడకండి. ఎన్ని ప్రయత్నాలు చేసినా ఫలితం లేకపోతే, ఒకసారి నిపుణులైన వైద్యుడిని సంప్రదించి సలహా తీసుకోవడం ఉత్తమం.

మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి