Food Safety Inspection Drive: మాదినాగుడ జీఎస్ఎం మాల్ బార్బెక్యూ నేషన్, చైనీస్ వోక్‌లలో ఫుడ్ సేఫ్టీ రైడ్స్!

హైదరాబాద్ మహానగరంలోని ఐటీ కారిడార్ పరిధిలో ఉన్న ప్రముఖ రెస్టారెంట్లు, బిర్యానీ పాయింట్లు మరియు మాల్స్‌లోని ఫుడ్ కోర్టులపై సైబరాబాద్ మున్సిపల్ కార్పొరేషన్ (CMC) తన తనిఖీలను మరింత తీవ్రతరం చేసింది. వీకెండ్స్ మరియు సాధారణ రోజుల్లో జనం భారీగా గుమికూడే షాపింగ్ మాల్స్‌లో నాణ్యత లేని, నిల్వ ఉంచిన ఆహార పదార్థాలను విక్రయిస్తున్నారనే సమాచారంతో అధికారులు రంగంలోకి దిగుతున్నారు. ఇందులో భాగంగా సోమవారం (జూన్ 29) మాదినాగుడలోని జీఎస్ఎం (GSM) మాల్ పరిధిలో మున్సిపల్ ఫుడ్ సేఫ్టీ బృందాలు ఆకస్మిక రైడ్స్ నిర్వహించాయి. ఈ రైడ్స్‌లో నగరంలో ఎంతో పేరుగాంచిన ‘బార్బెక్యూ నేషన్’ మరియు ‘చైనీస్ వోక్’ ఔట్‌లెట్లలో కస్టమర్ల ఆరోగ్యాన్ని ప్రమాదంలో పడేసే విస్తుపోయే నిజాలు వెలుగుచూశాయి.

బార్బెక్యూ నేషన్‌లో బొద్దింకల హల్‌చల్.. లేబుల్స్ లేని కుల్ఫీలు సీజ్!

మాదినాగుడ జీఎస్ఎం మాల్‌లో ఎంతో మంది కస్టమర్లు ఇష్టపడి వెళ్లే నాన్-వెజ్ బఫే రెస్టారెంట్ “బార్బెక్యూ నేషన్” (Barbeque Nation) లో ఫుడ్ సేఫ్టీ అధికారుల బృందం మొదట తనిఖీలు చేపట్టింది. ఇక్కడ ఆహార పదార్థాల నాణ్యతతో పాటు వంటగది నిర్వహణలో తీవ్ర లోపాలు కనిపించాయి.

బొద్దింకల సంచారం: రెస్టారెంట్‌కు సంబంధించిన ఫ్రూట్ స్టోరేజ్ ఏరియా (పండ్లను భద్రపరిచే స్థలం) లో మరియు ఐస్ క్రీములు, మాంసం ఉంచే రిఫ్రిజిరేటర్ల (ఫ్రిజ్) వెనుక భాగంలో భారీగా బొద్దింకల లార్వాలు, బొద్దింకల సంచారాన్ని అధికారులు గుర్తించారు. ఆహార పదార్థాలు నిల్వ ఉంచే చోట ఇలా కీటకాలు ఉండటం ఇన్ఫెక్షన్లకు దారితీస్తుందని అధికారులు ఆగ్రహం వ్యక్తం చేశారు.

లేబుల్స్ లేని స్వీట్స్ ధ్వంసం: కస్టమర్లకు డెజర్ట్స్ కింద వడ్డించేందుకు సిద్ధంగా ఉంచిన బ్రౌనీలు మరియు వివిధ రకాల కుల్ఫీలను (పాన్, మలై, కేసర్ పిస్తా ఫ్లేవర్లు) అధికారులు తనిఖీ చేశారు. అయితే వీటిపై ఎప్పుడు తయారు చేశారు? ఎక్స్‌పైరీ డేట్ ఎప్పుడు? అనే ఎలాంటి లేబుల్స్ లేవు. దీంతో అవన్నీ పాత స్టాక్ అయి ఉండవచ్చనే అనుమానంతో అధికారులు వాటన్నింటినీ అక్కడికక్కడే డస్ట్‌బిన్‌లో పారేయించి ధ్వంసం చేశారు.

సామగ్రి నిర్వహణ లోపం: వంటగదిలో కూరగాయలు, చికెన్ కట్ చేయడానికి ఉపయోగించే చాపింగ్ బోర్డులు (Chopping Boards) పూర్తిగా అరిగిపోయి, మురికి పేరుకుపోయి అత్యంత అధ్వాన్నమైన స్థితిలో ఉన్నాయి. అలాగే కూరగాయలు ఉంచే ప్లాస్టిక్ క్రేట్లు, వాటర్ బుల్ కంటైనర్లు అపరిశుభ్రంగా ఉండటాన్ని గమనించి వాటిని వెంటనే రీప్లేస్ చేయాలని నిర్వాహకులను ఆదేశించారు.

రికార్డుల మాయం: రెస్టారెంట్‌లో క్రమబద్ధంగా జరగాల్సిన ఫుడ్ టెస్టింగ్ నివేదికలు, ప్యాకేజింగ్ మెటీరియల్ క్వాలిటీ సర్టిఫికెట్లు మరియు పెస్ట్ కంట్రోల్ (కీటకాల నివారణ) చేసినట్లు చూపే ఎలాంటి రికార్డులను యాజమాన్యం అధికారులకు చూపించలేకపోయింది. అయితే ఇక్కడి సిబ్బందికి సంబంధించిన పర్సనల్ హైజీన్ మరియు మెడికల్ ఫిట్‌నెస్ రికార్డులు మాత్రం సరిగ్గా ఉన్నాయి. ఓవరాల్‌గా ఈ రెస్టారెంట్‌కు పరిశుభ్రత అసెస్‌మెంట్‌లో 110 మార్కులకు గాను కేవలం 86 మార్కులు (79%) మాత్రమే లభించాయి.

🍽️ Food Safety Inspection Drive

Restaurant: Barbeque Nation
📍 GSM Mall, Madinaguda
📅 29.06.2026

As part of routine food safety inspections across Cyberabad, CMC Food Safety teams inspected Barbeque Nation.

✅ Good Practices
• Medical fitness records of food handlers and… pic.twitter.com/0U1VBAooL0

— Cyberabad Municipal Corporation (@CMC_Offcl) June 29, 2026

‘చైనీస్ వోక్’ లో 36 గంటల నాటి అన్నం నిల్వ!

అదే మాల్‌లో ఉన్న మరో ప్రముఖ చైనీస్ ఫుడ్ చైన్ “చైనీస్ వోక్” (Chinese Wok) లోనూ అధికారులు తనిఖీలు నిర్వహించగా అక్కడి వంటగదిలోనూ విస్తుపోయే లోపాలు బయటపడ్డాయి.

పాత అన్నంతో ఫ్రైడ్ రైస్: ఇక్కడ అధికారులు ఫ్రిజ్‌లను తనిఖీ చేసినప్పుడు భారీ మొత్తంలో వండిన అన్నాన్ని (Cooked Rice) నిల్వ ఉంచినట్లు గుర్తించారు. దీనిపై విచారించగా, సదరు అన్నానికి ఏకంగా 36 గంటల పాటు ‘షెల్ఫ్ లైఫ్’ ఉన్నట్లు యాజమాన్యం పేర్కొంది. అయితే ఇంత సుదీర్ఘ కాలం పాటు వండిన అన్నాన్ని నిల్వ ఉంచేందుకు ఎలాంటి లాబొరేటరీ ల్యాబ్ వాలిడేషన్ లేదా ల్యాబ్ టెస్ట్ రిపోర్ట్స్ వారి వద్ద లేవు. బాక్టీరియా చేరే ప్రమాదం ఉన్న ఇలాంటి పాత అన్నంతోనే కస్టమర్లకు ఫ్రైడ్ రైస్ తయారు చేస్తున్నట్లు అధికారులు నిర్ధారించారు.

శుభ్రత లేని గుడ్లు.. గోళ్లు పెంచిన సిబ్బంది: వంటకు ఉపయోగించేందుకు తెచ్చిన కోడిగుడ్లను (Incoming Eggs) కనీసం కడగకుండా, వాటిపై ఉన్న మురికితోనే నేరుగా ఆమ్లెట్లు, రైస్‌లలో వాడుతున్నట్లు గుర్తించారు. అలాగే ఆహారాన్ని వడ్డించే ఒక సిబ్బంది చేతి గోళ్లు కత్తిరించకుండా (Untrimmed Nails) మురికిగా ఉండటాన్ని అధికారులు గమనించారు.

మురికి నీటి కొళాయిలు: అన్నం మరియు నూడుల్స్ ఉడికించే ప్రిపరేషన్ ఏరియా వద్ద ఉన్న వాటర్ టాప్స్ (నీటి కొళాయిలు) నాచుపట్టి, తీవ్రమైన జిడ్డుతో పేరుకుపోయి ఉన్నాయి.

లైసెన్స్ ప్రదర్శన లేదు: ఇక్కడ కూడా వార్షిక మెడికల్ ఫిట్‌నెస్ సర్టిఫికెట్లు, ఫుడ్ టెస్టింగ్ నివేదికలు అందుబాటులో లేవు. కస్టమర్లకు నమ్మకం కలిగించే విధంగా హోటల్ ప్రాంగణంలో ఎఫ్‌ఎస్‌ఎస్‌ఏఐ (FSSAI) లైసెన్స్‌ను ప్రముఖంగా ప్రదర్శించకపోవడాన్ని అధికారులు తప్పుపట్టారు. అయితే ఇక్కడ ఎలాంటి బొద్దింకలు, ఈగలు లేకపోవడం మరియు కిచెన్ ఫ్లోర్ పొడిగా ఉండటం గమనార్హం. వీరికి పరిశుభ్రత అంచనాలో 108 మార్కులకు గాను 88 మార్కులు (82%) లభించాయి.

🍽️ Food Safety Inspection Drive 2/2

Restaurant: Chinese Wok
📍 GSM Mall, Madinaguda
📅 29.06.2026

As part of routine food safety inspections across Cyberabad, CMC Food Safety teams inspected Chinese Wok.

✅ Good Practices
• No pest activity observed; pest control and water… pic.twitter.com/xmHO8XP0pu

— Cyberabad Municipal Corporation (@CMC_Offcl) June 29, 2026

ఇంప్రూవ్‌మెంట్ నోటీసులు జారీ చేసిన సీఎంసీ అధికారులు

నిబంధనలు ఉల్లంఘించి, ప్రజల ఆరోగ్యంతో ఆటలాడుకుంటున్న ఈ రెండు ప్రముఖ రెస్టారెంట్లకు సైబరాబాద్ మున్సిపల్ కార్పొరేషన్ ఆహార భద్రత విభాగం తక్షణమే ‘ఇంప్రూవ్‌మెంట్ నోటీసులు’ (Improvement Notice) జారీ చేసింది. నోటీసులలో పేర్కొన్న లోపాలను సరిదిద్దుకుని, వంటగదిలో పూర్తిస్థాయి పరిశుభ్రత ప్రమాణాలు పాటించేందుకు నిర్దేశిత గడువు విధించారు. ఒకవేళ గడువు ముగిసిన తర్వాత కూడా మార్పు రాకపోతే భారీ జరిమానాలతో పాటు రెస్టారెంట్ల లైసెన్సులను రద్దు చేసి, సీజ్ చేస్తామని అధికారులు కఠిన హెచ్చరికలు జారీ చేశారు.