కడుపులో బిడ్డ ఎదుగుదల అద్భుతంగా ఉండాలా? అయితే గర్భధారణ సమయంలో తీసుకోవాల్సిన జాగ్రత్తలు ఇవే!

Pregnancy

• గర్భధారణ సమయంలో తాజా, పోషకాహారం తీసుకోవడం తల్లి ఆరోగ్యానికి మాత్రమే కాదు, బిడ్డ సరైన ఎదుగుదలకు కూడా అత్యంత అవసరం.

• జంక్ ఫుడ్, అధిక కొవ్వు, ఎక్కువ చక్కెర ఉన్న ఆహారాన్ని నివారించి, ఆరోగ్యకరమైన బరువు పెరుగుదలపై దృష్టి పెట్టాలి.

• వైద్యుల సూచనలతో నడక, సున్నితమైన వ్యాయామం లేదా యోగా చేయడం ప్రసవానికి శరీరాన్ని సిద్ధం చేస్తుంది.

హైదరాబాద్: స్త్రీ జీవితంలో గర్భం దాల్చడం అనేది ఒక మధురమైన అనుభవం. ఈ తొమ్మిది నెలల ప్రయాణంలో తల్లి తీసుకునే ప్రతి నిర్ణయం, తినే ప్రతి ముద్ద కడుపులోని బిడ్డ ఎదుగుదలపై ప్రత్యక్ష ప్రభావం చూపుతుంది. అందుకే కాబోయే అమ్మ తన ఆహారపు అలవాట్లు, జీవనశైలి విషయంలో అదనపు జాగ్రత్తలు తీసుకోవాలని ఆరోగ్య నిపుణులు సూచిస్తున్నారు. కేవలం కడుపు నిండటం ముఖ్యం కాదు, అది బిడ్డకు పోషణను ఇచ్చేలా ఉండాలి.

తాజా ఆహారం: గర్భిణీలు (Pregnancy)సాధ్యమైనంత వరకు ఏ పూట ఆహారాన్ని ఆ పూటే తాజాగా వండుకుని తినడం శ్రేయస్కరం. వండిన పదార్థాలను ఎక్కువసేపు నిల్వ ఉంచి, మళ్ళీ వేడి చేసుకుని తినడం వల్ల అందులోని సహజ పోషకాలు నశించడమే కాకుండా, జీర్ణ సంబంధిత సమస్యలు వచ్చే అవకాశం ఉంది. ముఖ్యంగా రాత్రి మిగిలిన పదార్థాలను మరుసటి రోజు తినకపోవడమే మంచిది. వేడివేడి భోజనం తల్లికి ఉత్సాహాన్ని, బిడ్డకు సరైన పోషణను అందిస్తుంది.

బరువుపై నియంత్రణ: గర్భధారణ సమయంలో బరువు పెరగడం సహజం, కానీ ఆ పెరుగుదల ఆరోగ్యకరమైన పద్ధతిలో ఉండాలి. ఈ సమయంలో రకరకాల పదార్థాలు తినాలనిపించడం సహజమే. అయితే, కేవలం రుచి కోసం జంక్ ఫుడ్, నూనెలో వేయించిన పదార్థాలు, ప్రాసెస్ చేసిన ప్యాకెట్ ఫుడ్స్, మితిమీరిన స్వీట్లు తీసుకోకూడదు. ఇవి రక్తంలో చక్కెర స్థాయిలను పెంచి, అనవసరమైన కొవ్వును పెంచుతాయి. వీటికి బదులుగా పండ్లు, కూరగాయలు, నిపుణులు సూచించిన పోషకాహారాన్ని తీసుకోవాలి.

మాంసాహారం: మాంసాహారం తీసుకోవడం బిడ్డ ఎదుగుదలకు అవసరమైన ప్రోటీన్లను అందిస్తుంది. అయితే, తీసుకునే మాంసం లేదా గుడ్లు బాగా ఉడికినవి అయి ఉండాలి. సరిగ్గా ఉడకని మాంసం వల్ల ఇన్ఫెక్షన్లు వచ్చే ప్రమాదం ఉంది. ఇక నీటి విషయానికి వస్తే, గర్భిణీలు డీహైడ్రేషన్‌కు గురికాకుండా చూసుకోవాలి. కాచి చల్లార్చిన నీటిని తాగడం వల్ల ఇన్ఫెక్షన్ల భయం ఉండదు. నీటితో పాటు కొబ్బరి నీళ్లు, తాజా పండ్ల రసాలు తీసుకోవడం వల్ల శరీరానికి శక్తి లభించడమే కాకుండా, గర్భాశయంలో ‘ఉమ్మనీరు’ స్థాయిలు తగ్గకుండా ఉంటాయి.

వ్యాయామం: శరీరం భారంగా ఉందని వ్యాయామాన్ని పూర్తిగా మానేయకూడదు. వైద్యుల సలహా మేరకు ప్రతిరోజూ కొద్దిసేపు నడక లేదా సున్నితమైన యోగా ఆసనాలు వేయడం వల్ల శరీరం యాక్టివ్‌గా ఉంటుంది. ఇది కేవలం శారీరక దృఢత్వానికే కాకుండా, ప్రసవ సమయంలో వచ్చే ఇబ్బందులను ఎదుర్కోవడానికి కూడా తల్లిని సిద్ధం చేస్తుంది.

Also Read: దానిమ్మ అందరికీ అమృతం కాదు.. ఈ సమస్యలు ఉన్నవారు తింటే డేంజర్!