పాక్‌కు సెమీస్ చేరడం సాధ్యమా?

టీ20 వరల్డ్ కప్ 2026లో పాకిస్థాన్ జట్టు సంచలన సంక్షోభంలో చిక్కుకుంది. శనివారం పల్లెకెలె వేదికగా శ్రీలంకతో జరగబోయే కీలక మ్యాచ్ పాక్ పాలిట జీవన్మరణ సమస్యగా మారింది. గ్రూప్-2లో ఇప్పటికే ఇంగ్లాండ్ సెమీస్ బెర్త్ ఖాయం చేసుకుంది. రెండో స్థానం కోసం న్యూజిలాండ్‌తో పాకిస్థాన్ పోటీ పడుతోంది. కివీస్ +1.390 నెట్ రన్‌రేట్‌తో బలంగా ఉండగా పాకిస్థాన్ -0.461 NRRతో వెనకబడింది. కేవలం గెలవడం సరిపోదు, న్యూజిలాండ్‌ను దాటాలంటే పాక్ ఒక అసాధారణ అద్భుతం చేయాల్సిందే అని క్రికెట్ విశ్లేషకులు స్పష్టం చేస్తున్నారు.

సెమీస్ చేరాలంటే ఏం జరగాలి — తాజా లెక్కలు

లెక్కల ప్రకారం చూస్తే పాకిస్థాన్ ముందు బ్యాటింగ్ చేస్తే కనీసం 64 పరుగుల తేడాతో విజయం సాధించాలి. శ్రీలంక నిర్దేశించిన లక్ష్యాన్ని ఛేదించాల్సి వస్తే పరిస్థితి మరింత కఠినంగా మారుతుంది. లంక 150 పరుగులు చేస్తే పాక్ ఆ లక్ష్యాన్ని కేవలం 12.4 ఓవర్లలోనే పూర్తి చేయాలి. లంక 201 పరుగుల భారీ లక్ష్యాన్ని ఇస్తే దానిని కేవలం 13.5 ఓవర్లలోనే కొట్టేయాలి. అంటే ప్రతి ఓవర్లో సగటున 14 పరుగుల రేటుతో బ్యాటింగ్ చేయాలి. ప్రస్తుత ఫామ్ దృష్ట్యా ఇది పాక్ జట్టుకు కొండను తలకిందులు చేసినంత పని అని విశ్లేషకులు చెప్తున్నారు.

పాక్ బ్యాటింగ్ ఫామ్ ఎంత ఘోరంగా ఉంది?

పాకిస్థాన్ గత ఐదు మ్యాచ్‌ల గణాంకాలను పరిశీలిస్తే బ్యాటింగ్ వైఫల్యం స్పష్టంగా కనిపిస్తోంది. ఈ టోర్నీలో పాక్ ఒక్కసారి కూడా ఓవర్‌కి 10 పరుగుల సగటును అందుకోలేదు. నెదర్లాండ్స్ వంటి చిన్న జట్టుపై 147 పరుగుల లక్ష్యాన్ని ఛేదించడానికి పాక్ 19.3 ఓవర్లు తీసుకుంది. అప్పుడు సగటు 7.5 మాత్రమే నమోదైంది. నమీబియాపై 199 పరుగులు చేసినప్పటికీ సగటు 9.95 దగ్గరే ఆగిపోయింది. భారత్‌పై అయితే కేవలం 6.3 సగటుతో 114 పరుగులకే కుప్పకూలింది. ఇలాంటి నెమ్మదైన బ్యాటింగ్ తీరుతో శ్రీలంక బౌలర్లను ఎదుర్కొని 13 ఓవర్లలోనే మ్యాచ్ ముగించడం దాదాపు అసాధ్యమని విశ్లేషకులు భావిస్తున్నారు.

శ్రీలంక పరిస్థితి ఏమిటి?

శ్రీలంక జట్టు ఇప్పటికే టోర్నీ నుంచి నిష్క్రమించినప్పటికీ సొంత గడ్డపై చివరి మ్యాచ్ గెలిచి పరువు నిలుపుకోవాలని చూస్తోంది. పల్లెకెలె పిచ్ సాధారణంగా స్పిన్నర్లకు అనుకూలంగా ఉంటుంది. ఇది పాకిస్థాన్ బ్యాటర్లకు మరింత సవాలుగా మారే అవకాశం ఉంది. పాక్ బ్యాటర్లు విశ్వరూపం చూపి అద్భుతం సృష్టిస్తే తప్ప సెమీస్ ఆశలు సజీవంగా ఉండవు. మొత్తానికి పాకిస్థాన్ సెమీస్ చేరాలంటే కేవలం ప్రతిభే కాదు, కొండంత అదృష్టం కూడా కావాలి. శనివారం రాత్రి జరిగే ఈ తాజా పోరులో పాక్ గర్జిస్తుందో లేక నిరాశతో ఇంటి బాట పడుతుందో వేచి చూడాలి.