Mahalakshmi Smart Cards | మ‌హిళ‌ల‌కు తీపిక‌బురు.. త్వ‌ర‌లోనే మ‌హాల‌క్ష్మి స్మార్ట్‌కార్డులు ఇవ్వ‌నున్న ప్ర‌భుత్వం..!

Mahalakshmi Smart Card | తెలంగాణలో మహిళలకు అమలవుతున్న ఉచిత బస్సు ప్రయాణ పథకాన్ని మరింత పారదర్శకంగా, సులభతరంగా మార్చేందుకు రాష్ట్ర ప్రభుత్వం కీలక నిర్ణయం తీసుకుంది. ‘మహాలక్ష్మి’ పథకం కింద ప్రయాణించే మహిళలకు ప్రత్యేక స్మార్ట్ కార్డులను అందించేందుకు ప్రభుత్వం సిద్ధమైంది. తెలంగాణ ఆవిర్భావ దినోత్సవం సందర్భంగా జూన్ 2న సీఎం రేవంత్ రెడ్డి చేతుల మీదుగా ఈ ‘మహాలక్ష్మి స్మార్ట్ కార్డుల’ పంపిణీ కార్యక్రమాన్ని అధికారికంగా ప్రారంభించనున్నారు. ప్రస్తుతం మహిళలు ఆర్టీసీ బస్సుల్లో ఉచిత ప్రయాణం చేయాలంటే ప్రతిసారి కండక్టర్‌కు ఒరిజినల్ ఆధార్ కార్డు చూపించాల్సి వస్తోంది. దీంతో రద్దీ సమయాల్లో ఇబ్బందులు తలెత్తుతున్నాయి. కొన్నిసార్లు ఆధార్ కార్డు వెంట లేకపోవడం వల్ల మహిళలు అసౌకర్యానికి గురవుతున్నారు. ఈ సమస్యలకు పరిష్కారంగా ప్రభుత్వం స్మార్ట్ కార్డు విధానాన్ని తీసుకొస్తోంది. ఏటీఎం కార్డు తరహాలో ఉండే ఈ స్మార్ట్ కార్డును కండక్టర్ వద్ద ఉన్న ఎలక్ట్రానిక్ టికెటింగ్ మెషీన్‌కు స్కాన్ చేస్తే వెంటనే జీరో టికెట్ జారీ అవుతుంది. దీంతో టికెట్ జారీ ప్రక్రియ వేగవంతం కావడంతో పాటు ప్రయాణికుల సమయం కూడా ఆదా కానుంది.

Also Read

ఉచిత బస్సు ప్రయాణ పథకం అమలులోకి వచ్చిన తర్వాత మహిళల నుంచి మంచి స్పందన లభించింది. రోజుకు లక్షల సంఖ్యలో మహిళలు ఈ సేవలను వినియోగిస్తున్నారు. అయితే, ఈ పథకాన్ని కొందరు దుర్వినియోగం చేస్తున్నట్లు ప్రభుత్వం దృష్టికి వచ్చింది. ముఖ్యంగా ఇతర రాష్ట్రాలకు చెందిన కొందరు నకిలీ ఆధార్ కార్డులతో ఉచితంగా ప్రయాణిస్తున్న ఘటనలు బయటపడినట్లు సమాచారం. ఈ నేపథ్యంలో అసలైన లబ్ధిదారులను గుర్తించేందుకు మరియు అక్రమాలను అరికట్టేందుకు స్మార్ట్ కార్డు వ్యవస్థను అమలు చేయాలని ప్రభుత్వం నిర్ణయించింది. ఈ కొత్త కార్డులపై లబ్ధిదారురాలి ఫొటో, 16 అంకెల ప్రత్యేక గుర్తింపు సంఖ్య, నివాస వివరాలు స్పష్టంగా ముద్రిస్తారు. అవసరమైతే భవిష్యత్తులో క్యూ ఆర్ కోడ్ సదుపాయం కూడా జోడించే అవకాశాన్ని అధికారులు పరిశీలిస్తున్నట్లు తెలుస్తోంది. డిజిటల్ ధ్రువీక‌ర‌ణ వ్యవస్థ ద్వారా కార్డుల వినియోగంపై పూర్తి స్థాయిలో పర్యవేక్షణ ఉండనుంది.

రాష్ట్రవ్యాప్తంగా ఒకేసారి ఈ విధానాన్ని అమలు చేయకుండా, ముందుగా ప్రయోగాత్మకంగా ప్రారంభించనున్నారు. ప్రతి జిల్లాలో ఒక మండలాన్ని ఎంపిక చేసి పైలట్ ప్రాజెక్ట్ కింద కార్డులను జారీ చేస్తారు. అక్కడ ఎదురయ్యే సాంకేతిక సమస్యలు, సర్వర్ లోపాలు, స్కానింగ్ వ్యవస్థ పనితీరు వంటి అంశాలను సమీక్షించిన తర్వాత రాష్ట్రవ్యాప్తంగా విస్తరించనున్నారు. అర్హులైన మహిళలు తమ సమీపంలోని మీ సేవా కేంద్రాలు లేదా ఆర్టీసీ బస్ పాస్ కేంద్రాలకు వెళ్లి ఈ స్మార్ట్ కార్డులను పొందవచ్చు. ఇందుకోసం రూ.50 నామమాత్రపు రుసుము నిర్ణయించినట్లు సమాచారం. దరఖాస్తు ప్రక్రియను కూడా సులభతరం చేయాలని ప్రభుత్వం భావిస్తోంది. అవసరమైన పత్రాలు సమర్పించిన తర్వాత కార్డులు జారీ చేయనున్నారు. సంబంధిత కేంద్రాల వివరాలను ఆర్టీసీ అధికారిక వెబ్‌సైట్‌తో పాటు ప్రత్యేక హెల్ప్‌లైన్ ద్వారా అందుబాటులో ఉంచే అవకాశం ఉంది. ఇక స్మార్ట్ కార్డులు అందే వరకు మహిళలు ఎలాంటి ఆందోళన చెందాల్సిన అవసరం లేదని అధికారులు స్పష్టం చేస్తున్నారు. ప్రస్తుతం అమల్లో ఉన్న విధంగానే ఆధార్ కార్డు చూపించి ఉచిత ప్రయాణ సౌకర్యాన్ని కొనసాగించవచ్చని తెలిపారు. కార్డుల పంపిణీ పూర్తయ్యే వరకు పాత విధానమే అమల్లో ఉంటుంది.

సెంటర్ ఫర్ గుడ్ గవర్నెన్స్ (సీజీజీ) ఆధ్వర్యంలో రూపొందుతున్న ఈ స్మార్ట్ కార్డులను భవిష్యత్తులో బహుళ ప్రయోజనాల డిజిటల్ వాలెట్‌గా అభివృద్ధి చేసే యోచనలో ప్రభుత్వం ఉన్నట్లు తెలుస్తోంది. మహాలక్ష్మి పథకం కింద మహిళలకు అందించనున్న నెలవారీ ఆర్థిక సాయం రూ.2,500తో పాటు రూ.500ల గ్యాస్ సిలిండర్ సబ్సిడీ వంటి ఇతర సంక్షేమ పథకాల ప్రయోజనాలను కూడా ఇదే కార్డు ద్వారా అందించే అవకాశాలను పరిశీలిస్తున్నారు. ప్రభుత్వం తీసుకొస్తున్న ఈ కొత్త విధానంతో ఉచిత బస్సు ప్రయాణ పథకం మరింత సమర్థవంతంగా అమలవుతుందని, అర్హులైన మహిళలకు మాత్రమే ప్రయోజనాలు చేరేలా పర్యవేక్షణ బలపడుతుందని అధికారులు భావిస్తున్నారు.