హైదరాబాద్: ఇంటి కింద గుప్త నిధులు ఉన్నాయంటూ అమాయకులను నమ్మించి భారీగా డబ్బులు దోచుకుంటున్న ముఠా గుట్టును హైదరాబాద్ పోలీసులు రట్టు చేశారు. నకిలీ బంగారు నాణేలు చూపిస్తూ 11 మందిని మోసం చేసిన నలుగురు నిందితులను కమిషనర్ టాస్క్ఫోర్స్ శంషాబాద్ జోన్ పోలీసులు, రాజేంద్రనగర్ పోలీసులు సంయుక్తంగా అరెస్ట్ చేశారు. ఈ ముఠా సుమారు రూ.కోటి మేర మోసాలకు పాల్పడినట్లు పోలీసులు తెలిపారు.
గుప్త నిధుల పేరుతో భారీ మోసం
పోలీసుల వివరాల ప్రకారం.. ప్రధాన నిందితుడు మొహమ్మద్ మునావర్ అలియాస్ మున్నా (36) హైదరాబాద్లో పెరిగాడు. చదువు పూర్తయిన తర్వాత కార్ల డెంటింగ్, పెయింటింగ్ పనులు చేస్తూ జీవనం సాగించేవాడు.
అయితే తన ఆదాయం కుటుంబ అవసరాలకు సరిపోవడం లేదని భావించిన మునావర్.. సులభంగా డబ్బులు సంపాదించేందుకు మోసానికి తెరతీసినట్లు పోలీసులు తెలిపారు. తనకు భూమిలో దాచిన గుప్త నిధులను గుర్తించే ప్రత్యేక శక్తి, పరిజ్ఞానం ఉందంటూ అమాయకులను నమ్మించేవాడని పేర్కొన్నారు.
ఈ పథకంలో తన స్నేహితులైన సయ్యద్ అలీ అష్రఫ్, మొహమ్మద్ హాజీ, మొహమ్మద్ సల్మాన్లను భాగస్వాములుగా చేర్చుకున్నట్లు పోలీసులు తెలిపారు.
ఇంట్లోనే నకిలీ నాణేలు పాతిపెట్టి..
ముఠా సభ్యులు ముందుగా గుప్త నిధులు ఉన్నాయని నమ్మించిన వ్యక్తుల ఇళ్లకు వెళ్లేవారు. అనంతరం ఇంటి నేలను తవ్వి.. ముందుగానే సిద్ధం చేసుకున్న బొగ్గుతో కూడిన సంచిని, బంగారం పూత పూసిన నకిలీ నాణేలను అక్కడ పాతిపెట్టేవారు.
తవ్వకాలు పూర్తయిన తర్వాత వాటిని బయటకు తీసి.. అవే పురాతన బంగారు నాణేలని బాధితులను నమ్మించేవారు. అనంతరం బొగ్గును బంగారంగా మార్చేందుకు కొంత సమయం పడుతుందని చెప్పి అక్కడి నుంచి వెళ్లిపోయేవారని పోలీసులు వెల్లడించారు.
ఇలా గుప్త నిధుల పేరుతో వివిధ ప్రాంతాల్లో మొత్తం 11 మందిని మోసం చేసి సుమారు రూ.కోటి నగదును కొల్లగొట్టినట్లు పోలీసులు తెలిపారు.
నలుగురు నిందితులు అరెస్ట్
ఈ కేసులో పోలీసులు నలుగురిని అరెస్ట్ చేశారు.
- మొహమ్మద్ మునావర్ అలియాస్ మున్నా (36) – కార్ల డెంటింగ్, పెయింటింగ్ పనులు
- సయ్యద్ అలీ అష్రఫ్ (40) – ఎలక్ట్రీషియన్
- మొహమ్మద్ హాజీ (25) – ఆటో డ్రైవర్
- మొహమ్మద్ సల్మాన్ (29) – బైక్ మెకానిక్
పోలీసులకు చిక్కిన వస్తువులు ఇవే..
నిందితుల నుంచి, వారి వద్ద నుంచి పోలీసులు స్వాధీనం చేసుకున్న వాటిలో:
- 2 కార్లు
- 1 ఆటోరిక్షా
- 2 ద్విచక్ర వాహనాలు
- 4 సెల్ఫోన్లు
- 25 నకిలీ బంగారు నాణేలు
- 6 కిలోల బొగ్గు
- 4 కిలోల మట్టి
- పూజా సామగ్రి ఉన్నాయి.
రాజేంద్రనగర్ పోలీస్ స్టేషన్లో కేసు
ఈ వ్యవహారంపై హైదరాబాద్లోని రాజేంద్రనగర్ పోలీస్ స్టేషన్లో Cr.No. 916/2026 కింద BNS సెక్షన్లు 318(4), 351(2), 61(2) r/w 3(5) కింద కేసు నమోదు చేసి దర్యాప్తు చేస్తున్నారు.
గుప్త నిధుల పేరుతో ఎవరైనా వస్తే నమ్మొద్దు: పోలీసులు
ఇటీవల కొందరు మోసగాళ్లు గ్రామాలు, పట్టణాలు, వీధుల్లో తిరుగుతూ.. కొన్ని ప్రాంతాల్లో భూమిలో గుప్త నిధులు ఉన్నాయని ప్రచారం చేస్తూ అమాయకులను మోసం చేస్తున్నట్లు పోలీసుల దృష్టికి వచ్చినట్లు తెలిపారు.
భూమిలో గుప్త నిధులు ఉన్నాయని, వాటిని బయటకు తీస్తామని ఎవరైనా చెప్పినా నమ్మవద్దని పోలీసులు ప్రజలను హెచ్చరించారు. ఇలాంటి మోసాలకు పాల్పడుతున్న వ్యక్తులు కనిపిస్తే వెంటనే పోలీసులకు సమాచారం అందించాలని సూచించారు.
గుప్త నిధుల ఆశతో మోసగాళ్లను నమ్మి డబ్బులు పోగొట్టుకోవద్దని హైదరాబాద్ పోలీసులు ప్రజలకు విజ్ఞప్తి చేశారు.
