చలికాలంలో మార్నింగ్ వాకింగ్ అందరికీ మంచిదేనా? ఈ సమస్యలున్న వారు జాగ్రత్త

Morning Walking

హైదరాబాద్: నడక ఆరోగ్యానికి(Morning Walking) అమృతం లాంటిదని మనందరికీ తెలుసు. అందుకే చాలా మంది తెల్లవారుజామునే నిద్రలేచి నడక సాగిస్తుంటారు. అయితే, చలికాలంలో పరిస్థితి వేరుగా ఉంటుంది. బయట వీచే చల్లటి గాలులు అందరికీ మేలు చేయవు, ముఖ్యంగా వృద్ధులు, దీర్ఘకాలిక వ్యాధులతో బాధపడేవారికి ఈ చలిగాలి శాపంగా మారే అవకాశం ఉంది. ఉదయాన్నే నడకకు వెళ్లేవారు ఎలాంటి జాగ్రత్తలు తీసుకోవాలో, చలికాలం గుండె, ఊపిరితిత్తులపై ఎలాంటి ప్రభావం చూపుతుందో ఇప్పుడు వివరంగా తెలుసుకుందాం.

తీసుకోవాల్సిన జాగ్రత్తలు:

1. గుండెపై ఒత్తిడి: చలికాలంలో ఉష్ణోగ్రతలు తగ్గడం వల్ల మన శరీరంలోని రక్తనాళాలు బిగుసుకుపోతాయి. దీనివల్ల రక్తపోటు (BP) పెరిగి గుండెపై ఒత్తిడి పెరుగుతుంది. సాధారణంగా ఉదయం పూట హార్ట్ ఎటాక్ వచ్చే అవకాశాలు ఎక్కువగా ఉంటాయి, చలికాలం ఈ రిస్క్‌ను మరింత పెంచుతుంది.

2. ఊపిరితిత్తుల సమస్యలు: ఆస్తమా, బ్రోన్కైటిస్ వంటి శ్వాసకోశ సమస్యలు ఉన్నవారు చల్లటి గాలిని నేరుగా పీల్చడం వల్ల వాయునాళాలు వాపుకు గురవుతాయి. దీనివల్ల శ్లేష్మం పెరగడం, ఊపిరి ఆడకపోవడం వంటి ఇబ్బందులు ఎదురవుతాయి. ఇన్ఫెక్షన్లు వచ్చే ముప్పు కూడా ఎక్కువే.

3. ఎప్పుడు నడవాలి(Morning Walking)? తెల్లవారుజామున చీకటిగా, చలిగా ఉన్నప్పుడు కాకుండా.. కాస్త ఎండ వచ్చిన తర్వాతే నడకకు వెళ్లడం ఉత్తమం. బయటకు వెళ్లడానికి ముందు ఇంట్లోనే కొన్ని తేలికపాటి శ్వాస వ్యాయామాలు (Breathing exercises) చేయడం వల్ల ఊపిరితిత్తులు సిద్ధంగా ఉంటాయి.

4. రక్షణ కవచం తప్పనిసరి: చలి ప్రభావం నేరుగా శరీరంపై పడకుండా మాస్కు, చెవిలో దూది, తలకు టోపీ, కాళ్లకు సాక్స్‌లు, చేతులకు గ్లౌవ్స్ ధరించాలి. మందపాటి జర్కిన్లు లేదా స్వెటర్లు వేసుకోవడం ద్వారా శరీరం వెచ్చగా ఉంటుంది.

5. ప్రమాద సంకేతాలను గమనించడం: నడిచేటప్పుడు ఛాతీలో నొప్పిగా అనిపించినా, విపరీతమైన చెమట పట్టినా, శ్వాస తీసుకోవడం ఇబ్బందిగా ఉన్నా లేదా అలసటగా అనిపించినా అస్సలు నిర్లక్ష్యం చేయవద్దు. వెంటనే నడక ఆపేసి విశ్రాంతి తీసుకోవాలి, డాక్టర్‌ను సంప్రదించాలి.

ఇతర సూచనలు:

బయట చలి మంటల వద్ద వచ్చే పొగకు దూరంగా ఉండండి, ఇది ఊపిరితిత్తులకు హానికరం. వీలైనంత వరకు గోరువెచ్చని నీరు తాగాలి. తీపి పదార్థాలను తగ్గించి ఆరోగ్యకరమైన ఆహారం తీసుకోవాలి. బీపీ, షుగర్ ఉన్నవారు డాక్టర్ల సలహాతో అవసరమైన టీకాలు (Vaccines) తీసుకోవడం మంచిది.

ఆరోగ్యం కోసం చేసే నడక అనారోగ్యానికి దారితీయకూడదు. కాబట్టి వాతావరణాన్ని బట్టి మీ అలవాట్లను మార్చుకొని సురక్షితంగా ఉండండి.

మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి