స్టీల్ పాత్రల్లో ఈ ఆహారాలు పెడితే విషంతో సమానం.. కిచెన్ లో మీరు చేసే పొరపాట్లు ఇవే!

Steel

హైదరాబాద్: పూర్వం మన ఇళ్లలో మట్టి పాత్రలే రాజ్యమేలేవి. కానీ కాలక్రమేణా మన్నిక కోసం, సౌకర్యం కోసం మనం అల్యూమినియం, స్టీల్ పాత్రల వైపు మొగ్గు చూపుతున్నాము. నేడు పల్లెటూళ్లలో కూడా మట్టి పాత్రల వాడకం తగ్గిపోయింది. అయితే, స్టీల్ (Steel)పాత్రలు ఎక్కువ కాలం మన్నుతాయన్న మాట నిజమే కానీ, కొన్ని రకాల ఆహార పదార్థాలను వీటిలో నిల్వ చేయడం వల్ల అవి విషపూరితంగా మారుతాయని ఆరోగ్య నిపుణులు హెచ్చరిస్తున్నారు. స్టీల్ లోని రసాయనాలు ఆహారంతో చర్య జరిపి రుచిని మార్చడమే కాకుండా, శరీరానికి హాని కలిగిస్తాయి.

స్టీల్ పాత్రల్లో నిల్వ చేయకూడని పదార్థాలు :

1. పచ్చళ్లు (Pickles): భారతీయ వంటకాల్లో పచ్చళ్లకు ప్రత్యేక స్థానం ఉంది. పచ్చళ్లు ఎక్కువ కాలం నిల్వ ఉండటానికి మనం ఉప్పు, నూనె, వివిధ మసాలాలు వాడుతుంటాం. పచ్చళ్లలో సహజంగానే ఆమ్లాలు ఉంటాయి. వీటిని స్టీల్ పాత్రల్లో ఉంచినప్పుడు, ఆ ఆమ్లాలు స్టీల్‌తో రసాయన చర్య జరిపి పాత్రలు తుప్పు పట్టేలా చేస్తాయి. ఆ తుప్పు పచ్చడిలో కలిసి దాని నాణ్యతను, రుచిని పాడు చేస్తుంది. అందుకే పచ్చళ్లను ఎప్పుడూ గాజు పాత్రలలో లేదా జాడీలలోనే నిల్వ చేయాలి. ప్లాస్టిక్ కూడా మంచిది కాదు.

2. పెరుగు : పెరుగు ఆరోగ్యానికి ఎంతో మేలు చేస్తుంది, కానీ దానిని స్టీల్ (Steel)గిన్నెలో నిల్వ చేయడం వల్ల ఆ ప్రయోజనం పోతుంది. పెరుగులో ఉండే కొన్ని పదార్థాలు స్టీల్‌తో ప్రతికూలంగా స్పందిస్తాయి. దీనివల్ల పెరుగు త్వరగా పులిసిపోవడమే కాకుండా, తన సహజ సువాసనను కోల్పోతుంది. పెరుగును నిల్వ చేయడానికి మట్టి పాత్రలు అత్యుత్తమం. ఇవి పెరుగును తాజాగా ఉంచి, రుచిని రెట్టింపు చేస్తాయి. గాజు పాత్రలు కూడా వాడుకోవచ్చు.

3. నిమ్మ, టమాటో: సిట్రస్ జాతికి చెందిన నిమ్మకాయలు, టమాటోలలో ‘సిట్రిక్ యాసిడ్’ పుష్కలంగా ఉంటుంది. వీటి రసాన్ని లేదా వీటితో చేసిన గ్రేవీలను స్టీల్ పాత్రల్లో ఎక్కువ కాలం ఉంచితే, అవి లోహంతో చర్య జరిపి విషపూరిత సమ్మేళనాలను ఏర్పరుస్తాయి. దీనివల్ల ఆహారం చేదుగా మారుతుంది. ఇది శరీరంలో ఆమ్లత్వాన్ని పెంచి, గ్యాస్ట్రిక్, గుండెల్లో మంట, అజీర్ణం వంటి సమస్యలకు దారితీస్తుంది.

4. తాజా పండ్లు: పండ్లు విటమిన్లు, ఖనిజాలకు నిలయం. కానీ వీటిని స్టీల్ (Steel)పాత్రల్లో ఉంచితే పండ్లలోని తేమ ఆవిరైపోతుంది. ఫలితంగా పండ్లు త్వరగా కుళ్ళిపోవడానికి, వాటి సహజ సువాసన కోల్పోవడానికి అవకాశం ఉంటుంది. పోషక విలువలు కూడా తగ్గుతాయి.

గుర్తుంచుకోవాల్సిన విషయం:

ఆహారాన్ని ఉడికించేటప్పుడు స్టీల్ పాత్రల నుండి వెలువడే రసాయనాలు ఆహారంలో కలిసి, ఫుడ్ పాయిజనింగ్ లేదా కడుపు సంబంధిత సమస్యలకు కారణం కావచ్చు. కాబట్టి, వంటకు స్టీల్ వాడినా.. నిల్వ చేయడానికి మాత్రం గాజు, పింగాణీ లేదా మట్టి పాత్రలనే ఎంచుకోండి.

మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి