PM Modi | భారత రాజకీయ చరిత్రలో ప్రధానమంత్రి నరేంద్ర మోదీ మరో అరుదైన ఘనతను తన ఖాతాలో వేసుకున్నారు. దేశంలో ప్రజాస్వామ్యబద్ధంగా ఎన్నికై అత్యధిక కాలం నిరంతరాయంగా ప్రధానమంత్రి పదవిలో కొనసాగిన నేతగా ఆయన కొత్త రికార్డు సృష్టించారు. ఈ క్రమంలో స్వతంత్ర భారత తొలి ప్రధాని జవహర్లాల్ నెహ్రూ పేరిట ఉన్న 4,398 రోజుల రికార్డును అధిగమించి 4,399 రోజులు పూర్తి చేశారు. 2014 మే 26న తొలిసారి ప్రధానిగా బాధ్యతలు స్వీకరించిన మోదీ, వరుసగా 2019, 2024 సార్వత్రిక ఎన్నికల్లో విజయాలు సాధిస్తూ మూడోసారి కూడా దేశ పగ్గాలు చేపట్టారు. దీంతో అత్యధిక కాలం ప్రజల మద్దతుతో అధికారంలో కొనసాగిన ప్రధానమంత్రిగా ఆయన ప్రత్యేక గుర్తింపు పొందారు.
ఈ సందర్భంగా కేంద్ర కేబినెట్ ప్రధాని మోదీకి అభినందనలు తెలుపుతూ ప్రత్యేక తీర్మానం చేసింది. రక్షణ మంత్రి రాజ్నాథ్ సింగ్, హోంమంత్రి అమిత్ షా సహా పలువురు కేంద్ర మంత్రులు, బీజేపీ సీనియర్ నేతలు, వివిధ రాష్ట్రాల ముఖ్యమంత్రులు శుభాకాంక్షలు తెలిపారు. దేశంలోని పలు ప్రాంతాల్లో బీజేపీ శ్రేణులు సంబరాలు నిర్వహించగా, కొన్ని ఆలయాల్లో ప్రత్యేక పూజలు కూడా జరిగాయి. తెలంగాణకు చెందిన బీజేపీ నేత రామచంద్రరావు స్పందిస్తూ ఇది కేవలం రాజకీయ రికార్డు మాత్రమే కాదని, 140 కోట్ల మంది భారతీయులు మోదీ నాయకత్వంపై ఉంచిన విశ్వాసానికి ప్రతీక అని పేర్కొన్నారు. దేశ అభివృద్ధి, సంక్షేమం, జాతీయ భద్రత రంగాల్లో ఆయన తీసుకున్న నిర్ణయాలు దేశ చరిత్రలో ప్రత్యేక స్థానాన్ని సంపాదించాయని అన్నారు. మోదీ నాయకత్వంలో పేదల సంక్షేమం, మహిళల సాధికారత, మౌలిక సదుపాయాల విస్తరణ, ఆర్టికల్ 370 రద్దు, సరిహద్దు భద్రత బలోపేతం, ఉగ్రవాదం మరియు నక్సలిజంపై కఠిన చర్యలు వంటి అనేక కీలక అంశాల్లో దేశం ముందడుగు వేసిందని బీజేపీ నేతలు పేర్కొంటున్నారు.
మరోవైపు ఈ చారిత్రక సందర్భాన్ని పురస్కరించుకుని కేంద్ర సమాచార సాంకేతిక, రైల్వే శాఖ మంత్రి అశ్విని వైష్ణవ్ ఢిల్లీలోని లోధి రోడ్ ప్రాంతంలోని ఆలయంలో ప్రత్యేక పూజలు నిర్వహించారు. ప్రపంచవ్యాప్తంగా అనిశ్చిత పరిస్థితులు నెలకొన్న సమయంలో భారతదేశానికి స్థిరమైన, బలమైన నాయకత్వం లభించడం గర్వకారణమని ఆయన వ్యాఖ్యానించారు. భారత్ను అభివృద్ధి చెందిన దేశంగా తీర్చిదిద్దే లక్ష్యంతో మోదీ ప్రభుత్వం ముందుకు సాగుతోందని, భవిష్యత్తులో కూడా అదే అంకితభావంతో ప్రజలకు సేవలు అందిస్తారని అశ్విని వైష్ణవ్ ఆశాభావం వ్యక్తం చేశారు. ప్రజాస్వామ్య వ్యవస్థలో ప్రజల విశ్వాసాన్ని వరుసగా మూడు ఎన్నికల్లో గెలుచుకోవడం, అనంతరం అత్యధిక కాలం ప్రధానిగా కొనసాగడం మోదీ రాజకీయ ప్రయాణంలో మరో కీలక అధ్యాయంగా నిలిచిందని రాజకీయ వర్గాలు విశ్లేషిస్తున్నాయి.
