టీ, కాఫీ ఆరోగ్యానికి మంచిదేనా? ఉదయం లేవగానే టీ లేదా కాఫీ తాగడం చాలామందికి రోజువారీ అలవాటు. కొందరు ఒత్తిడి తగ్గించుకోవడానికి, మరికొందరు శరీరానికి ఉత్సాహం వచ్చినట్లు అనిపిస్తుందని టీ, కాఫీలను ఎక్కువగా తీసుకుంటుంటారు. అయితే వీటిని ఎప్పుడు తాగాలి? రోజుకు ఎన్నిసార్లు తీసుకోవచ్చు? ఖాళీ కడుపుతో టీ లేదా కాఫీ తాగడం మంచిదేనా? మధుమేహం ఉన్నవారు వీటిని తీసుకోవచ్చా? టీ, కాఫీతో ఐరన్, కాల్షియం లోపం వస్తుందా? వంటి అనేక సందేహాలు ప్రజల్లో ఉన్నాయి. ఈ అంశాలపై డయాబెటాలజిస్ట్ డాక్టర్ దిలీప్ గూడె పలు విషయాలను వివరించారు.
టీ, కాఫీలో ఉండే పదార్థాలేంటి?
డాక్టర్ వివరాల ప్రకారం.. టీలో ప్రధానంగా థియోఫిలిన్, కాఫీలో కెఫైన్ ఉంటాయి. ఇవి ఉత్ప్రేరకాలుగా పనిచేస్తాయి. శరీరంలోని సింపథటిక్ డ్రైవ్‌ను కొంత పెంచడం ద్వారా చురుకుదనం వచ్చినట్లు అనిపించవచ్చు.
అందుకే టీ లేదా కాఫీ తాగిన తర్వాత వెంటనే శరీరానికి రీచార్జ్ అయినట్లు, ఉత్సాహంగా ఉన్నట్లు కొందరికి అనిపిస్తుంది. అయితే వీటిని మితంగా తీసుకోవడమే మంచిదని వైద్యులు సూచిస్తున్నారు.
ఉదయం లేవగానే టీ, కాఫీ తాగొచ్చా?
ఉదయం నిద్రలేచిన వెంటనే ఖాళీ కడుపుతో టీ లేదా కాఫీ తీసుకోవడం మంచిది కాదని డాక్టర్ తెలిపారు. రాత్రంతా ఆహారం తీసుకోకపోవడంతో ఉదయం కడుపు ఖాళీగా ఉంటుంది. ఇప్పటికే అసిడిటీ సమస్య ఉన్నవారికి ఖాళీ కడుపుతో వేడి టీ లేదా కాఫీ తీసుకోవడం వల్ల ఇబ్బంది మరింత పెరిగే అవకాశం ఉందని చెప్పారు.
అందువల్ల ముందుగా అల్పాహారం తీసుకుని.. ఆ తర్వాత అరగంట నుంచి గంట వ్యవధిలో టీ లేదా కాఫీ తీసుకోవడం మంచిదని సూచించారు.
టీ, కాఫీలో చక్కెర వేయడం సమస్యేనా?
టీ లేదా కాఫీ కంటే వాటిలో అదనంగా వేసే చక్కెర విషయంలో ఎక్కువ జాగ్రత్త అవసరమని డాక్టర్ పేర్కొన్నారు. ముఖ్యంగా రోజులో పలుమార్లు టీ, కాఫీ తీసుకుంటూ ప్రతిసారి చక్కెర కలిపితే మొత్తం క్యాలరీల పరిమాణం పెరుగుతుంది.
వ్యాయామం ద్వారా ఆ అదనపు క్యాలరీలను ఖర్చు చేయలేకపోతే బరువు, మెటబాలిక్ ఆరోగ్యంపై ప్రభావం పడే అవకాశం ఉంటుంది. అందువల్ల వీలైనంత వరకు చక్కెర లేకుండా టీ లేదా కాఫీ తీసుకోవాలని సూచించారు.
రోజుకు ఎన్నిసార్లు టీ, కాఫీ తీసుకోవాలి?
ఉదయం, మధ్యాహ్నం, సాయంత్రం ఇలా రోజులో పలుమార్లు టీ లేదా కాఫీ తీసుకోవడం అలవాటుగా మార్చుకోవద్దని డాక్టర్ సూచించారు. ముఖ్యంగా నిద్రకు సంబంధించిన సమస్యలు ఉన్నవారు కెఫైన్ విషయంలో మరింత జాగ్రత్తగా ఉండాలి.
కెఫైన్ ప్రభావం చాలా గంటల పాటు కొనసాగవచ్చని, అందువల్ల సాధారణంగా మధ్యాహ్నం 2–3 గంటల తర్వాత టీ లేదా కాఫీ తీసుకోకుండా ఉండటం మంచిదని ఆయన తెలిపారు.
కాఫీలో కెఫైన్ పరిమాణం ఎక్కువగా ఉండే అవకాశం ఉన్నందున టీతో పోలిస్తే కాఫీ నిద్రపై ఎక్కువ ప్రభావం చూపే అవకాశం ఉందని వివరించారు.
మధుమేహం ఉన్నవారు టీ, కాఫీ తాగొచ్చా?
మధుమేహం ఉన్నవారు కూడా టీ లేదా కాఫీ తీసుకోవచ్చని డాక్టర్ తెలిపారు. అయితే ఖాళీ కడుపుతో కాకుండా అల్పాహారం తర్వాత తీసుకోవడం మంచిదన్నారు.
ప్రధానంగా చక్కెరను కలపకుండా తీసుకోవాలని సూచించారు. టీ లేదా కాఫీకి అదనంగా చక్కెర కలిపే అలవాటు మధుమేహం ఉన్నవారికి ప్రత్యేకంగా సమస్యగా మారే అవకాశం ఉంది.
ఆర్టిఫిషియల్ స్వీటెనర్లు సురక్షితమేనా?
చక్కెరకు బదులుగా జైలిటాల్, ఆస్పర్టేమ్ వంటి ఆర్టిఫిషియల్ స్వీటెనర్లను ప్రతిరోజూ ఉపయోగించడం విషయంలో కూడా జాగ్రత్త అవసరమని డాక్టర్ తెలిపారు.
వీటిని దీర్ఘకాలం నిరంతరం ఉపయోగించడం వల్ల రక్తపోటు, మెటబాలిక్ సమస్యలు, రక్తంలో చక్కెర నియంత్రణకు సంబంధించిన సమస్యలు వచ్చే అవకాశం ఉందని ఆయన పేర్కొన్నారు. అందువల్ల వీటిని రోజువారీ అలవాటుగా మార్చుకోవద్దని సూచించారు.
టీ, కాఫీ వల్ల ఐరన్ లోపం వస్తుందా?
టీ తాగడం వల్లనే శరీరంలో ఐరన్ లోపం ఏర్పడుతుందని చెప్పడానికి తగిన ఆధారం లేదని డాక్టర్ వివరించారు. అయితే ఐరన్ టాబ్లెట్ తీసుకున్న వెంటనే టీ లేదా కాఫీ తీసుకోవడం వల్ల ఐరన్ శోషణకు అంతరాయం కలిగే అవకాశం ఉందని చెప్పారు.
అలాగే అసిడిటీ కోసం యాసిడ్‌ను తగ్గించే మందులను దీర్ఘకాలంగా ఉపయోగించే వారిలో కూడా ఐరన్ శోషణపై ప్రభావం ఉండే అవకాశం ఉందని వివరించారు.
టీ వల్ల ఎముకలు బలహీనపడతాయా?
టీ తాగడం వల్లే ఎముకల్లోని కాల్షియం తగ్గిపోతుందని చెప్పడానికి స్పష్టమైన ఆధారాలు లేవని డాక్టర్ తెలిపారు. కాల్షియం, ఎముకల ఆరోగ్యానికి విటమిన్ డి కూడా కీలకమని చెప్పారు.
శరీరంలో విటమిన్ డి స్థాయిలు తక్కువగా ఉంటే ఎంత కాల్షియం తీసుకున్నా దాని శోషణ సరిగా జరగకపోవచ్చని వివరించారు. అవసరాన్ని బట్టి వైద్యుల సూచనతో కాల్షియం, విటమిన్ డి సప్లిమెంట్లు లేదా ఫోర్టిఫైడ్ ఆహారాలను తీసుకోవచ్చని తెలిపారు.
టీ, కాఫీతో సిగరెట్ కలిపి తీసుకుంటే ప్రమాదమేనా?
టీ లేదా కాఫీతో పాటు సిగరెట్ తాగే అలవాటు మాత్రం ప్రమాదకరమని డాక్టర్ స్పష్టం చేశారు. టీ, కాఫీలోని కెఫైన్, సిగరెట్‌లోని నికోటిన్ రెండూ శరీరాన్ని ఉత్తేజపరిచే ప్రభావాన్ని కలిగి ఉంటాయి.
నికోటిన్ గుండె స్పందన, రక్తపోటు, శరీరంలోని ‘ఫైట్ ఆర్ ఫ్లైట్’ ప్రతిస్పందనపై ప్రభావం చూపుతుందని తెలిపారు. సిగరెట్‌కు సురక్షితమైన పరిమితి అంటూ ఏదీ లేదని స్పష్టం చేశారు.
టీ లేదా కాఫీతో సిగరెట్ తాగినప్పుడు తాత్కాలికంగా రిలాక్స్‌డ్‌గా లేదా ఎనర్జిటిక్‌గా అనిపించినప్పటికీ.. అది కొద్దిసేపు మాత్రమే ఉండే ప్రభావమని డాక్టర్ వివరించారు. వాస్తవానికి ఒత్తిడి తగ్గడం కంటే మరింత పెరిగే అవకాశం ఉందని పేర్కొన్నారు.
తలనొప్పి వస్తే కాఫీ తాగడం సరైనదేనా?
తలనొప్పి వచ్చినప్పుడల్లా కాఫీ తాగడం పరిష్కారం కాదని డాక్టర్ తెలిపారు. రోజుకు మూడు, నాలుగు సార్లు కాఫీ తాగే అలవాటు ఉన్నవారు అకస్మాత్తుగా కాఫీని తగ్గించినా లేదా ఆపేసినా కెఫైన్ విత్‌డ్రాయల్ కారణంగా తలనొప్పి రావచ్చని వివరించారు.
దీర్ఘకాలంగా అధికంగా టీ, కాఫీ తీసుకోవడం వల్ల కొందరిలో తలనొప్పి, ముఖ్యంగా మైగ్రేన్ సమస్యలు ట్రిగ్గర్ అయ్యే అవకాశం ఉందని చెప్పారు. కాబట్టి తలనొప్పికి టీ లేదా కాఫీని చికిత్సగా భావించకూడదని సూచించారు.
బ్లాక్ టీ, బ్లాక్ కాఫీ మంచివేనా?
బ్లాక్ టీ లేదా బ్లాక్ కాఫీని చక్కెర లేకుండా తీసుకోవడం సాధారణంగా సమస్య కాదని డాక్టర్ తెలిపారు. టీ లేదా కాఫీలో పాలు కలపడం కంటే ప్రధానంగా చక్కెర, ఇతర స్వీటెనర్లను అధికంగా ఉపయోగించడంపైనే జాగ్రత్త అవసరమని వివరించారు.
పాల ఉత్పత్తులను పూర్తిగా మానేయాల్సిన అవసరం లేదని, పెరుగు, మజ్జిగ వంటి వాటిని తీసుకోవచ్చని కూడా సూచించారు.
చివరగా..
టీ, కాఫీ పూర్తిగా మానేయాల్సిన అవసరం లేదని, అయితే మితంగా, సరైన సమయంలో తీసుకోవడం ముఖ్యమని డాక్టర్ దిలీప్ గూడె సూచించారు. ముఖ్యంగా ఖాళీ కడుపుతో టీ, కాఫీ తీసుకోకపోవడం, చక్కెరను తగ్గించడం, మధ్యాహ్నం తర్వాత కెఫైన్ తీసుకోకుండా ఉండడం, టీ లేదా కాఫీతో పాటు సిగరెట్ తాగే అలవాటును పూర్తిగా నివారించడం వంటి అంశాలపై దృష్టి పెట్టాలని తెలిపారు.
గమనిక: పై సమాచారం డాక్టర్ ఇంటర్వ్యూలో వెల్లడించిన అభిప్రాయాల ఆధారంగా రూపొందించబడింది. వ్యక్తిగత ఆరోగ్య పరిస్థితులు, మందులు, మధుమేహం, అసిడిటీ లేదా నిద్ర సమస్యలను బట్టి ఆహారపు అలవాట్లలో మార్పులు చేసుకునే ముందు వైద్యుడిని సంప్రదించడం మంచిది.
