వేసవి సెలవుల్లో జాగ్రత్త! పిల్లలు, యువత కోసం పోలీసులు ఇచ్చిన హెచ్చరికలు

తెలంగాణ విద్యాశాఖ అకాడెమిక్ క్యాలెండర్ ప్రకారం ఏప్రిల్ 24 నుండి రాష్ట్రవ్యాప్తంగా పాఠశాలలకు వేసవి సెలవులు మొదలయ్యాయి. జూన్ 11 వరకు దాదాపు 50 రోజుల విరామంలో పిల్లలు ఊళ్లకు వెళ్లడం, స్నేహితులతో గడపడం, అనేక ఆనందకర కార్యక్రమాల్లో పాల్గొంటున్నారు. అయితే ఈ ఆనందం విషాదంగా మారకుండా తల్లిదండ్రులు కొన్ని కీలక జాగ్రత్తలు తీసుకోవాలని పోలీస్ శాఖ హెచ్చరిస్తోంది.

మైనర్లకు వాహనాలు ఇస్తే జైలుకే

ఇది అత్యంత తీవ్రమైన హెచ్చరిక. సెలవుల్లో పిల్లలు ఇంట్లో ఉండలేక బైకులు, కార్లు నడపాలని అడుగుతుంటారు. చాలా మంది తల్లిదండ్రులు అభ్యంతరం చెప్పకుండా వాహనాలు ఇస్తున్నారు. ఇది చట్టపరంగా తీవ్రమైన నేరం. డ్రైవింగ్ లైసెన్స్ లేని మైనర్లు వాహనం నడుపుతూ పట్టుబడితే వాహన యజమాని లేదా తల్లిదండ్రులపై క్రిమినల్ కేసులు నమోదు చేసి జైలుకు పంపే అవకాశం ఉంది. “పిల్లల ప్రాణాలకు తల్లిదండ్రులే బాధ్యులు” అని పోలీసులు స్పష్టం చేస్తున్నారు.

ఈత సరదాలతో ప్రాణాలకు ముప్పు

వేసవి తాపం నుండి ఉపశమనం కోసం పిల్లలు గ్రామాల్లో చెరువులు, కాలువలు, బావులు, నదుల వద్దకు వెళ్తారు. నీటి లోతు తెలియకుండా, ఈత సరిగా రాకుండా నీటిలోకి దిగడం వల్ల ప్రతి వేసవిలో అనేకమంది విద్యార్థులు జలసమాధి అవుతున్నారు. పిల్లలను ఒంటరిగా నీటి వనరుల వద్దకు పంపవద్దు. అది ఎంత చిన్న చెరువైనా సరే ఒక్క నిమిషం అజాగ్రత్త ప్రాణాంతకంగా మారవచ్చు.

ఊరికి వెళ్తున్నారా? ఇల్లు సురక్షితంగా ఉంచుకోండి

ఇంటికి తాళం వేసి ఊరికి వెళ్తున్నారని సోషల్ మీడియాలో పోస్ట్ చేయవద్దు. ఇది నేరగాళ్లకు స్పష్టమైన సంకేతం ఇస్తుంది. వెళ్లే ముందు స్థానిక పోలీస్ స్టేషన్లో సమాచారం ఇవ్వండి. లాక్ హౌస్ మానిటరింగ్ సిస్టమ్ (LHMS) సేవలను వినియోగించుకోండి. ప్రయాణంలో ఉన్నప్పుడు ఫోటోలు, లొకేషన్ సోషల్ మీడియాలో పోస్ట్ చేయడం ఖచ్చితంగా మానుకోండి.

వేసవి ఆరోగ్య జాగ్రత్తలు

మధ్యాహ్నం 12 గంటల నుండి సాయంత్రం 4 గంటల వరకు పిల్లలను బయట ఆడనివ్వకండి. మజ్జిగ, కొబ్బరి నీళ్లు, ఓఆర్ఎస్ పానీయాలు ఎక్కువగా ఇవ్వండి. ఊరికి వెళ్లే ముందు గ్యాస్ సిలిండర్ రెగ్యులేటర్ ఆపేయడం మర్చిపోవద్దు. అన్ని ఎలక్ట్రానిక్ ఉపకరణాలు సురక్షితంగా ఉంచండి.

సెలవులను సార్థకంగా మలుచుకోండి

సెలవులు కేవలం టీవీ, మొబైల్ స్క్రీన్లకు పరిమితం చేయకండి. పెయింటింగ్, మ్యూజిక్, యోగా వంటి నైపుణ్యాలు నేర్చుకోమని పిల్లలను ప్రోత్సహించండి. గ్రంథాలయాలకు తీసుకెళ్లి పుస్తకాలు చదివే అలవాటు పెంపొందించండి. సెలవులు పిల్లల సృజనాత్మకతను వెలికితీసే అవకాశంగా వాడుకోండి.

ఏదైనా అనుమానాస్పద పరిస్థితి ఎదురైతే వెంటనే డయల్ 100కి కాల్ చేయాలని పోలీస్ శాఖ విజ్ఞప్తి చేసింది.
Also Read : మంచిర్యాలలో కానిస్టేబుల్ దారుణం .. నడిరోడ్డుపై చెడ్డీతో భార్య‌పై అమానుషం ..