రెండు PPF ఖాతాలు తెరిస్తే వడ్డీ వస్తుందా? — కేంద్రం కొత్త రూల్ తెలుసుకోండి, లేదంటే నష్టపోతారు!

దేశంలో అత్యంత ప్రజాదరణ పొందిన సేవింగ్స్ స్కీమ్‌లో ఒకటైన పబ్లిక్ ప్రావిడెంట్ ఫండ్ (PPF) గురించి కేంద్ర ప్రభుత్వం ఇప్పుడు ఖాతాదారులను అప్రమత్తం చేస్తోంది. ఒక వ్యక్తి పేరుపై రెండు PPF ఖాతాలు తెరిస్తే రెండో ఖాతా చెల్లదని, అందులో జమ చేసిన సొమ్మును వడ్డీ లేకుండా తిరిగి ఇచ్చేస్తారని స్పష్టం చేసింది. లక్షల మంది ఈ పథకంలో పెట్టుబడులు పెడుతున్న నేపథ్యంలో ఈ నిబంధన తెలుసుకోవడం చాలా అవసరం.

PPF అంటే ఏమిటి ? ఎందుకు ఇంత పాపులర్?

కేంద్ర ప్రభుత్వం నిర్వహించే పొదుపు పథకాల్లో PPF అగ్రగామిగా నిలుస్తోంది. ఉద్యోగులు, వ్యాపారులు మాత్రమే కాకుండా సామాన్య ప్రజలు కూడా తక్కువ మొత్తంతో ప్రారంభించవచ్చు. ప్రస్తుతం 7.1 శాతం వడ్డీ రేటు అందిస్తోంది. బ్యాంకుల ఫిక్స్‌డ్ డిపాజిట్లతో పోలిస్తే ఇది అధికంగానే ఉంది. అంతేకాక ఆదాయపు పన్ను చట్టంలోని సెక్షన్ 80సి కింద పెట్టుబడిపై టాక్స్ మినహాయింపు కూడా లభిస్తుంది. ప్రభుత్వ హామీ ఉన్న పథకం కావడంతో భద్రత విషయంలో ఎలాంటి సందేహం అవసరం లేదు. ఈ మూడు కారణాల వల్లే అధిక ఆదాయం ఉన్నవారు, మధ్యతరగతి వర్గాలు అందరూ PPF వైపు ఆకర్షితమవుతున్నారు.

Also Read: ఏపీ అనాథ పిల్లలకు గుడ్న్యూస్, ప్రతి నెలా అకౌంట్లోకి రూ.1,750 వస్తుంది, ఇలా దరఖాస్తు చేసుకోండి!

రెండు ఖాతాలు తెరవొచ్చా ? అసలు నిజమేమిటి?

PPF స్కీమ్ 2019 నిబంధనల ప్రకారం ఒక వ్యక్తి ఒక ఖాతా మాత్రమే తెరవడానికి అనుమతి ఉంది. ఉమ్మడి ఖాతాలు కూడా అనుమతించరు. మీ PPF ఖాతా పాన్ నంబర్‌తో నేరుగా లింక్ అయి ఉంటుంది. దీంతో రెండో ఖాతా తెరవడానికి ప్రయత్నిస్తే సిస్టమ్ ఆటోమేటిక్‌గా గుర్తిస్తుంది. రెండో ఖాతాలో వేసిన సొమ్ముపై ఒక్క రూపాయి వడ్డీ కూడా రాదు . కేవలం అసలు మాత్రమే తిరిగి వస్తుంది. అంటే మీరు సంవత్సరాల పాటు ఆ ఖాతాలో సొమ్ము జమ చేసినా ఏ ప్రయోజనం ఉండదు. ఆర్థిక శాఖ ఆధ్వర్యంలోని నేషనల్ సేవింగ్స్ ఇన్‌స్టిట్యూట్ అధికారిక వెబ్‌సైట్‌లో ఈ నిబంధనలు స్పష్టంగా పేర్కొన్నారు. అయినప్పటికీ చాలామంది తెలియకుండానే రెండో ఖాతా తెరిచి నష్టపోతున్నారు.

పెట్టుబడి పరిమితులు తెలుసుకోండి

PPF లో ఒక ఆర్థిక సంవత్సరంలో కనీసం రూ.500 నుంచి గరిష్టంగా రూ.1.50 లక్షల వరకు పెట్టుబడి పెట్టవచ్చు. ఏడాదిలో ఒకేసారి లేదా వాయిదాల వారీగా కూడా జమ చేసుకోవచ్చు. 15 సంవత్సరాల పాటు పెట్టుబడి కొనసాగించాల్సి ఉంటుంది. మెచ్యూరిటీ తర్వాత వడ్డీతో సహా మొత్తం సొమ్మును ఒకేసారి పొందవచ్చు. అవసరమైతే మెచ్యూరిటీ తర్వాత 5 సంవత్సరాల చొప్పున పొడిగించుకోవచ్చు. మధ్యలో అత్యవసర పరిస్థితుల్లో నిర్దిష్ట నిబంధనలకు లోబడి పాక్షికంగా తీసుకోవచ్చు. పూర్తిగా విత్‌డ్రా చేసుకోవాలంటే మాత్రం 15 ఏళ్లు పూర్తయ్యే వరకు వేచి ఉండాల్సిందే.

మైనర్లకు PPF ఖాతా తెరవొచ్చా?

మైనర్లకు కూడా PPF ఖాతా తెరవొచ్చు. కానీ 18 ఏళ్లు వచ్చేంత వరకు తల్లిదండ్రులు లేదా చట్టబద్ధమైన సంరక్షకుడి ఆధ్వర్యంలో నిర్వహించాల్సి ఉంటుంది. పిల్లల భవిష్యత్తు కోసం ముందుగానే పొదుపు ప్రారంభించాలనుకునే తల్లిదండ్రులకు ఇది మంచి అవకాశం. అయితే తల్లి పేరు మీద ఒక ఖాతా, పిల్లల పేరు మీద ఒక ఖాతా ఇవి వేర్వేరు వ్యక్తులకు చెందినవి కాబట్టి ఇందులో అభ్యంతరం లేదు. గందరగోళం కలగకుండా ఈ తేడా గుర్తు పెట్టుకోవాలి.

అధికంగా పెట్టుబడి పెట్టాలంటే?

PPF లో గరిష్ట పరిమితి రూ.1.50 లక్షలు మాత్రమే. అంతకు మించి పెట్టుబడి పెట్టాలనుకునేవారు నేషనల్ పెన్షన్ సిస్టమ్ (NPS), సుకన్య సమృద్ధి యోజన లేదా మ్యూచువల్ ఫండ్స్ వంటి ఇతర పెట్టుబడి మార్గాలు పరిశీలించవచ్చు. PPF ఒక సురక్షితమైన, నమ్మకమైన పొదుపు సాధనమే — కానీ నిబంధనలు సరిగా తెలుసుకుని పెట్టుబడి పెట్టడం మాత్రం తప్పనిసరి.