Pancreatitis
హైదరాబాద్: ప్రస్తుత కాలంలో ఆరోగ్యం పట్ల మనం ఎంత జాగ్రత్తగా ఉంటున్నామో, కొన్ని వ్యాధులు అంతే వేగంగా దాడి చేస్తున్నాయి. ముఖ్యంగా ‘ప్యాంక్రియాటైటిస్’ అనే పదం ఇటీవల కాలంలో ఎక్కువగా వినిపిస్తోంది. ఒకప్పుడు ఇది కేవలం వృద్ధులలో మాత్రమే కనిపించేది, కానీ ఇన్నుడు 30 నుండి 40 ఏళ్ల మధ్య వయసున్న యువతలో కూడా ఈ కేసులు భారీగా పెరుగుతున్నాయి. మన శరీరంలో జీర్ణక్రియకు, చక్కెర స్థాయిని నియంత్రించడానికి కీలకమైన ‘ప్యాంక్రియాస్’ (క్లోమ గ్రంథి) వాపుకు గురవడమే ఈ వ్యాధి లక్షణం.
ప్యాంక్రియాటైటిస్(Pancreatitis) అంటే ఏమిటి?
ప్యాంక్రియాస్(Pancreatitis) మన కడుపు వెనుక భాగంలో ఉండే ఒక చిన్న అవయవం. ఇది ఆహారం అరగడానికి ఎంజైమ్లను, రక్తంలో చక్కెరను నియంత్రించడానికి ఇన్సులిన్ను విడుదల చేస్తుంది. ఏదైనా కారణం చేత ఈ గ్రంథి వాపుకు గురైనప్పుడు, అది విడుదల చేయాల్సిన ఎంజైమ్లు బయటకు వెళ్లకుండా గ్రంథిపైనే దాడి చేస్తాయి. ఇది అత్యంత బాధాకరమైన పరిస్థితి. ఇందులో అకస్మాత్తుగా వచ్చే అక్యూట్, ఎక్కువ కాలం వేధించే క్రానిక్ అనే రెండు రకాలు ఉన్నాయి.
కారణాలు: భారతదేశంలో ఈ వ్యాధి పెరగడానికి ప్రధాన కారణం మారుతున్న జీవనశైలి అని వైద్యులు చెబుతున్నారు.
యువతలో ఉన్న చెడు అలవాట్లే ఈ వ్యాధి రావడానికి ముఖ్య కారణం. ముఖ్యంగా మహిళల్లో పిత్తాశయంలో రాళ్లు ఏర్పడటం వల్ల ప్యాంక్రియాటైటిస్ వచ్చే అవకాశం ఉంది. నూనె వస్తువులు, కొవ్వు పదార్థాలు ఎక్కువగా తీసుకోవడం, శారీరక శ్రమ లేకపోవడం వల్ల ఊబకాయం పెరిగి ఈ ముప్పు వాటిల్లుతుంది.
ఇతర కారణాలు: ధూమపానం, రక్తంలో కొవ్వు (ట్రైగ్లిజరైడ్స్) పెరగడం, కొన్ని రకాల మందుల దుర్వినియోగం.
సంకేతాలు: కడుపు పైభాగంలో తీవ్రమైన నొప్పి రావడం, అది వెన్ను వైపు పాకడం దీని ప్రధాన లక్షణం. దీనితో పాటు వికారం, వాంతులు, జ్వరం, హృదయ స్పందన వేగంగా ఉండటం వంటివి కనిపిస్తాయి. వీటిని సాధారణ గ్యాస్ సమస్యగా భావించి నిర్లక్ష్యం చేస్తే, అది కిడ్నీల వైఫల్యం, డయాబెటిస్ లేదా ప్యాంక్రియాటిక్ క్యాన్సర్ వంటి ప్రమాదాలకు దారితీస్తుంది.
నివారణ మార్గాలు: ప్యాంక్రియాటైటిస్ను సరైన జీవనశైలి ద్వారా నివారించవచ్చు. మద్యపానం, ధూమపానానికి దూరంగా ఉండటం, తక్కువ కొవ్వు, ఎక్కువ ఫైబర్ ఉన్న ఆహారం తీసుకోవడం, తగినంత నీరు తాగడం చాలా ముఖ్యం. పిత్తాశయ(Gallbladder) రాళ్లు ఉన్నట్లు గుర్తిస్తే వెంటనే చికిత్స చేయించుకోవాలి. సకాలంలో రోగ నిర్ధారణ చేసి, వైద్యుల సలహాతో మందులు వాడితే ఈ ప్రాణాంతక పరిస్థితి నుండి బయటపడవచ్చు.
మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి
తరచుగా అడిగే ప్రశ్నలు
ప్యాంక్రియాటైటిస్ ప్రమాదకరమైన వ్యాధేనా?
అవును. సకాలంలో చికిత్స చేయకపోతే ఇది ప్రాణాంతక సమస్యలకు దారితీయవచ్చు.
యువతలో ప్యాంక్రియాటైటిస్ ఎందుకు పెరుగుతోంది?
మారుతున్న జీవనశైలి, మద్యపానం, ఫాస్ట్ ఫుడ్, శారీరక శ్రమ లేకపోవడం ప్రధాన కారణాలు.
ప్యాంక్రియాటైటిస్ను పూర్తిగా నివారించవచ్చా?
ఆరోగ్యకరమైన జీవనశైలి, తక్కువ కొవ్వు ఆహారం, మద్యపానం మానేయడం ద్వారా ఈ వ్యాధి ముప్పును తగ్గించవచ్చు.
