పసుపుతోనూ ప్రమాదమా? ఈ సమస్యలు ఉన్నవారు పొరపాటున కూడా ఎక్కువగా వాడకండి!

Turmeric

హైదరాబాద్: భారతీయ వంటకాల్లో పసుపు(Turmeric)కు ఉన్న ప్రాముఖ్యత అంతా ఇంతా కాదు. దీనిని కేవలం ఒక మసాలా దినుసుగానే కాకుండా, ఒక గొప్ప ఔషధంగా కూడా మనం భావిస్తాం. పసుపులో ఉండే యాంటీ ఆక్సిడెంట్లు, యాంటీ బ్యాక్టీరియల్, యాంటీ ఇన్‌ఫ్లమేటరీ గుణాలు ఇన్ఫెక్షన్లతో పోరాడి మన శరీరంలో రోగనిరోధక శక్తిని పెంచుతాయి. అయితే, ఏదైనా సరే ఆరోగ్యానికి మంచిది కదా అని అతిగా వాడటం మనలో చాలామందికి ఉన్న అలవాటు. సరిగ్గా ఇదే పసుపు విషయంలోనూ అనర్థాలకు దారితీస్తుందని ఆరోగ్య నిపుణులు హెచ్చరిస్తున్నారు. మోతాదుకు మించి పసుపును తీసుకోవడం వల్ల మనం ఊహించని పలు ఆరోగ్య సమస్యలు ఎదురయ్యే అవకాశం ఉంది.

జీర్ణక్రియపై ప్రతికూల ప్రభావం: సాధారణంగా పసుపు (Turmeric)మన శరీరంలో పైత్య రసం ఉత్పత్తిని ప్రేరేపిస్తుంది. ఇది జీర్ణాశయంలో ఆమ్లాల ఉత్పత్తిని పెంచి, మనం తిన్న ఆహారం త్వరగా అరిగేలా చేయడంలో సహకరిస్తుంది. అయితే, పసుపు మోతాదు పెరిగినప్పుడు పైత్య రసం, ఆమ్లాలు పరిమితికి మించి ఉత్పత్తి అవుతాయి. దీనివల్ల జీర్ణాశయంపై తీవ్ర ఒత్తిడి పడి కడుపులో మంట, అజీర్తి, వికారం, వాంతులు వంటి సమస్యలు తలెత్తుతాయి. ఇప్పటికే గ్యాస్ట్రిక్ సమస్యలతో బాధపడేవారిలో ఈ ప్రభావం మరింత ఎక్కువగా ఉంటుంది.

కిడ్నీలో రాళ్లు, రక్తహీనత: పసుపును ఎక్కువగా వాడటం వల్ల దీర్ఘకాలంలో కిడ్నీలో రాళ్లు ఏర్పడే ప్రమాదం ఉందని పరిశోధనలు చెబుతున్నాయి. పసుపులో ఉండే కొన్ని సమ్మేళనాలు కిడ్నీల పనితీరుపై ప్రభావం చూపుతాయి. అలాగే, పసుపులోని ‘కర్క్యుమిన్’ అనే పదార్థం మన శరీరం ఐరన్‌ను గ్రహించే సామర్థ్యాన్ని తగ్గిస్తుంది. మనం ఐరన్ అధికంగా ఉండే ఆహారం తీసుకున్నప్పటికీ, శరీరంలో పసుపు శాతం ఎక్కువగా ఉంటే ఆ ఇనుమును శరీరం సరిగ్గా వాడుకోలేదు. ఫలితంగా ఇది దీర్ఘకాలంలో రక్తహీనత కు దారితీస్తుంది.

మరికొన్ని ఇబ్బందులు: పసుపు అధికంగా తీసుకోవడం వల్ల కొంతమందిలో తలనొప్పి, నిద్రమత్తుగా అనిపించడం వంటి సమస్యలు ఎదురవుతాయి. మరికొందరిలో జీర్ణ సంబంధిత ఇబ్బందుల వల్ల విరేచనాలు లేదా మలబద్ధకం వంటి సమస్యలు కూడా తలెత్తవచ్చు. అందుకే నిపుణుల సూచన ప్రకారం, రోజువారీ కూరల్లో అర టీస్పూన్ కంటే ఎక్కువ పసుపు వేసుకోకపోవడమే మంచిది. పసుపు ఇచ్చే పూర్తి ఆరోగ్య ప్రయోజనాలను పొందాలంటే దానిని సరైన మోతాదులో వాడటం ఎంతో ముఖ్యం.

మరిన్ని లైఫ్ స్టైల్ వార్తల కోసం ఇక్కడ క్లిక్ చేయండి