చెపాక్‌లో కేకేఆర్‌కు చేదు ఓటమి.. చరిత్రలోనే చెత్త ఆరంభం, షారూఖ్ టీమ్ స‌ర్ధుకోవ‌ల్సిందేనా?

ఐపీఎల్ 2026 సీజన్‌లో కోల్‌కతా నైట్ రైడర్స్ పరిస్థితి రోజురోజుకు దారుణంగా మారుతోంది. మంగళవారం చెన్నైలోని ఎం.ఏ. చిదంబరం స్టేడియంలో జరిగిన మ్యాచ్‌లో చెన్నై సూపర్ కింగ్స్ చేతిలో 32 పరుగుల తేడాతో ఓడిపోయిన కేకేఆర్, ఐపీఎల్ చరిత్రలోనే చెత్త ఆరంభాన్ని నమోదు చేసింది.

చరిత్రలోనే చెత్త ఆరంభం

ఇవి కూడా చదవండి

ఈ సీజన్‌లో ఇప్పటివరకు ఆడిన మొదటి ఐదు మ్యాచ్‌ల్లో కేకేఆర్ ఒక్క విజయం కూడా సాధించలేకపోయింది. నాలుగు మ్యాచ్‌ల్లో ఓటమి పాలవగా, ఒక మ్యాచ్ వర్షం కారణంగా రద్దయింది. ఐపీఎల్ ప్రారంభమైనప్పటి నుంచి ఇది కేకేఆర్‌కు అత్యంత దారుణమైన ఆరంభం కావడం గమనార్హం. ఈ పరిస్థితి జట్టు యాజమాన్యం, అభిమానుల్లో ఆందోళన కలిగిస్తోంది.

సీఎస్‌కే బౌలర్ల దాడికి కుప్పకూలిన కేకేఆర్

193 పరుగుల లక్ష్యంతో బరిలోకి దిగిన కేకేఆర్ బ్యాటర్లు మొదటి నుంచే తడబడ్డారు. ఫిన్ అలెన్ (1) త్వరగా అవుట్ కాగా, సునీల్ నరైన్ (24) కూడా ఎక్కువసేపు నిలవలేకపోయాడు. కెప్టెన్ అజింక్యా రహానే, అంగ్క్రిష్ రఘువంశీలు కాస్త ప్రతిఘటించినా స్కోరు వేగం పెంచలేకపోయారు.

మిడిల్ ఆర్డర్‌లో రింకూ సింగ్ (6), కామెరాన్ గ్రీన్ (0) నిరాశపరిచారు. చివర్లో రోవ్‌మన్ పావెల్ (31), రమణదీప్ సింగ్ (35) పోరాడినా ఫలితం మారలేదు. సీఎస్‌కే బౌలర్ నూర్ అహ్మద్ 3 వికెట్లు తీసి మెరవ‌గా, అంశుల్ కంబోజ్ 2 వికెట్లతో కేకేఆర్‌ను కట్టడి చేశారు.

సీఎస్‌కే బ్యాటింగ్‌లో మెరుపులు

టాస్ గెలిచి బ్యాటింగ్ ఎంచుకున్న చెన్నై సూపర్ కింగ్స్ 20 ఓవర్లలో 5 వికెట్ల నష్టానికి 192 పరుగులు చేసింది. కెప్టెన్ రుతురాజ్ గైక్వాడ్ (7) విఫలమైనప్పటికీ, సంజూ శాంసన్ (48) కీలక ఇన్నింగ్స్ ఆడాడు.

యువ ఆటగాడు ఆయుష్ మాత్రే 17 బంతుల్లో 38 పరుగులు చేసి స్కోరును వేగంగా ముందుకు నడిపించాడు. డేవాల్డ్ బ్రెవిస్ (41), సర్ఫరాజ్ ఖాన్ (23) చివర్లో వేగంగా ఆడి సీఎస్‌కేకు బలమైన స్కోరు అందించారు.

కేకేఆర్‌కు ముందున్న కఠిన సవాలు

ప్రస్తుతం పాయింట్ల పట్టికలో చివరి స్థానంలో ఉన్న కేకేఆర్, ప్లే-ఆఫ్స్ ఆశలు నిలుపుకోవాలంటే ఇకపై ప్రతి మ్యాచ్‌ను గెలవాల్సిన పరిస్థితి ఏర్పడింది. ముఖ్యంగా టాప్ ఆర్డర్ బ్యాటింగ్ మెరుగుపడకపోతే జట్టుకు మరింత ఇబ్బందులు తప్పవు.

మరోవైపు, ఈ విజయంతో చెన్నై సూపర్ కింగ్స్ వరుసగా రెండో గెలుపును నమోదు చేసి పాయింట్ల పట్టికలో ముందుకు కదిలింది. నెట్ రన్ రేట్ మెరుగుపడితే సీఎస్‌కే టాప్-4లోకి చేరే అవకాశాలు కనిపిస్తున్నాయి.