101 మంది అరెస్ట్.. రూ.17 కోట్ల సైబర్ మోసాల లింకులు.. నెట్‌వర్క్‌లో ఉద్యోగులు, మాజీ సైనికుడు
తెలంగాణలో సైబర్ నేరాలపై పోలీసులు చేపట్టిన ప్రత్యేక దర్యాప్తులో విస్తుపోయే విషయాలు వెలుగులోకి వచ్చాయి. సైబర్ మోసగాళ్లకు డబ్బులు తరలించడంలో వివిధ వర్గాలకు చెందిన వ్యక్తులు సహకరించినట్లు దర్యాప్తులో గుర్తించారు.
ఇందులో కార్పొరేట్ ఉద్యోగి, మాజీ సైనికుడు, ఫ్లిప్‌కార్ట్ ఉద్యోగి, MBA గ్రాడ్యుయేట్‌తో పాటు NGOల పేర్లతో తెరిచిన బ్యాంకు ఖాతాలను కూడా సైబర్ నేరాలకు ఉపయోగించినట్లు అధికారులు గుర్తించారు. తెలంగాణ సైబర్ సెక్యూరిటీ బ్యూరో (TGCSB) రెండు వారాల పాటు తెలంగాణ, ఆంధ్రప్రదేశ్, కర్ణాటక, తమిళనాడు, కేరళ, పుదుచ్చేరిల్లో నిర్వహించిన ఆపరేషన్‌లో 18 మంది మహిళలు సహా మొత్తం 101 మందిని అరెస్ట్ చేసింది. దర్యాప్తులో సుమారు రూ.17 కోట్ల మేర మోసపూరిత లావాదేవీలను గుర్తించగా.. దేశవ్యాప్తంగా 1,172 సైబర్ క్రైమ్ లింకులను గుర్తించారు.
మ్యూల్ బ్యాంక్ ఖాతాల ద్వారా డబ్బుల తరలింపు
దర్యాప్తు ప్రకారం ఈ నెట్‌వర్క్‌లో మ్యూల్ బ్యాంక్ ఖాతాలు కీలకంగా పనిచేశాయి. సైబర్ మోసగాళ్లు ఏజెంట్లు, మధ్యవర్తుల ద్వారా బ్యాంకు ఖాతాలను సేకరించి.. బాధితుల నుంచి మోసం చేసి తీసుకున్న డబ్బును వాటిలో జమ చేయడం, ఇతర ఖాతాలకు బదిలీ చేయడం, నగదు రూపంలో తీసుకోవడం చేసేవారని పోలీసులు గుర్తించారు.
ఈ ఖాతాలను అందించిన ఖాతాదారులు, మధ్యవర్తులకు వారి ఖాతాల ద్వారా తరలించిన మోసపూరిత మొత్తంలో 5 శాతం వరకు కమీషన్ చెల్లించినట్లు దర్యాప్తులో వెల్లడైంది. అనంతరం ATMల ద్వారా నగదు ఉపసంహరణలు, భారీ మొత్తాల్లో బదిలీలు, విదేశాలకు అనుసంధానమైన లావాదేవీల ద్వారా డబ్బును తరలించినట్లు పోలీసులు గుర్తించారు.
అరెస్టయిన 101 మందిలో 19 మందిని ఏజెంట్లుగా, 81 మందిని మ్యూల్ ఖాతాదారులుగా గుర్తించారు. వారి నుంచి మొబైల్ ఫోన్లు, సిమ్ కార్డులు, బ్యాంకు పాస్‌బుక్‌లు, చెక్‌బుక్‌లను పోలీసులు స్వాధీనం చేసుకున్నారు.
నిందితుల ప్రొఫైళ్లు చూసి అధికారులకే షాక్
ఈ కేసులో వివిధ రంగాలకు చెందిన వ్యక్తుల ప్రమేయం ఉన్నట్లు దర్యాప్తులో తేలింది. టాటా క్యాపిటల్‌లో పనిచేసే ఓ ఉద్యోగి సైబర్ మోసగాళ్ల కోసం మ్యూల్ ఖాతాలను ఏర్పాటు చేయడంలో ఏజెంట్‌గా పనిచేసినట్లు ఆరోపణలు ఉన్నాయి.
ఫ్లిప్‌కార్ట్‌లో పనిచేస్తున్న ఓ గ్రాడ్యుయేట్ తన బ్యాంకు ఖాతాను మోసపూరిత లావాదేవీలకు ఉపయోగించుకునేందుకు అనుమతించినట్లు పోలీసులు గుర్తించారు. అతనికి దేశవ్యాప్తంగా 50 సైబర్ క్రైమ్ కేసులతో సంబంధం ఉన్నట్లు TGCSB తెలిపింది.
ఓ మాజీ సైనికుడు కూడా సైబర్ నేరాల్లో పాల్గొన్నట్లు ఆరోపణలు ఉండగా.. అతనికి ఆరు కేసులతో సంబంధం ఉన్నట్లు గుర్తించారు. ఫిల్మ్ టెక్నాలజీలో డిప్లొమా చేసిన మరో వ్యక్తికి 26 కేసులతో, M.Com చదివిన ఓ వ్యాపారికి 34 కేసులతో సంబంధం ఉన్నట్లు దర్యాప్తులో తేలింది.
మంజు గ్రూప్ ఆఫ్ కంపెనీస్‌లో మార్కెటింగ్ హెడ్‌గా పనిచేస్తున్న MBA గ్రాడ్యుయేట్‌కు 15 సైబర్ క్రైమ్ కేసులతో సంబంధం ఉన్నట్లు TGCSB వెల్లడించింది.
NGO ఖాతాల ద్వారా కూడా లావాదేవీలు
NGO ట్రస్ట్‌ల పేర్లతో ఉన్న బ్యాంకు ఖాతాలను కూడా సైబర్ నేరాలకు ఉపయోగించినట్లు అధికారులు గుర్తించారు. ఈ ఖాతాల ద్వారా సైబర్ నేరాలకు సంబంధించిన డబ్బును స్వీకరించి, ఇతర ఖాతాలకు బదిలీ చేసినట్లు దర్యాప్తులో వెల్లడైంది. ఈ ఖాతాలకు దేశవ్యాప్తంగా 60 కేసులతో సంబంధం ఉన్నట్లు పోలీసులు గుర్తించారు.
TGCSB పరిధిలోని ఏడు సైబర్ క్రైమ్ పోలీస్ స్టేషన్లలో నమోదైన 51 కేసులకు ఈ అరెస్టులు సంబంధం కలిగి ఉన్నాయి. అరెస్టయిన వారిలో 50 మందికి ఐదుకంటే ఎక్కువ సైబర్ క్రైమ్ లింకులు ఉన్నట్లు అధికారులు తెలిపారు.
మరిన్ని అంతర్రాష్ట్ర, అంతర్జాతీయ లింకులను గుర్తించేందుకు దర్యాప్తు కొనసాగుతోందని TGCSB తెలిపింది. నకిలీ ట్రేడింగ్ ప్లాట్‌ఫారాలు, టాస్క్ ఆధారిత ఆదాయ పథకాలు, ‘డిజిటల్ అరెస్ట్’ పేరుతో జరిగే మోసాల విషయంలో ప్రజలు అప్రమత్తంగా ఉండాలని సూచించింది. సైబర్ నేరాలకు గురైన వారు 1930 హెల్ప్‌లైన్ లేదా జాతీయ సైబర్ క్రైమ్ రిపోర్టింగ్ పోర్టల్ ద్వారా ఫిర్యాదు చేయాలని అధికారులు సూచించారు.
